Трамп Канада, Мексика ва Хитой товарларига катта божлар жорий қилмоқда

АҚШ 1 февралдан бошлаб Канада ва Мексикадан келган товарларга 25 фоиз, Хитойдан эса 10 фоизлик божлар жорий қилади. Бу ҳақда кеча, 31 январь куни Оқ уй матбуот котиби Кэролайн Ливитт маълум қилди.

“Президент Дональд Трамп буни қилишга ваъда берган ва у ваъдасини бажармоқда”, дейди у.

Аввалроқ “Reuters” ахборот агентлиги Трамп тарифларни жорий этишни 1 мартгача кечиктириши мумкинлиги ҳақида хабар берганди. Бироқ Ливитт бундай хабарларни “ҳақиқатга тўғри келмайди” деб айтди.

Америка фонд индекслари АҚШ Президентининг қарорига пасайиш билан жавоб берди. 31 январь куни S&P 500 индекси 0,5 фоизга, Nasdaq composite 0,3 фоизга, Dow Jones Industrial Average индекси 0,8 фоизга пасайди.

Трамп аввалроқ қўшни давлатларга нисбатан савдо тарифларини жорий этиш зарурлигини, Мексика бу давлатдан АҚШга келаётган ноқонуний муҳожирлар оқимини тўхтатиши, Канада эса гиёҳванд моддалар, хусусан, фентанил савдосини тўхтатиши кераклигини айтган эди.

Канада Бош вазири Жастин Трюдо унинг мамлакати Вашингтон тарифларига қарши “кучли, аммо оқилона” жавоб чораларини кўришини айтди. Шу билан бирга, у ватандошларини “қийин вақтларга” тайёрланишга чақирди.

“Bloomberg” маълумотларига кўра, Канада аллақачон Трампнинг режалари амалга оширилса, жавоб тарифлари қўйиладиган 105 миллиард долларлик АҚШ товарлари рўйхатини тайёрлаб қўйган.

Канада Ташқи ишлар вазири Мелани Жоли эса АҚШ Давлат котиби Марко Рубио билан музокарадан сўнг Оттавадан муқаррар жавоб чоралари ҳақида огоҳлантирган.

Ўз навбатида, Мексика Қўшма Штатларга қарши жавоб чораларини тайёрламоқда. “The Guardian”нинг ёзишича, бу “бузғунчи савдо уруши”га олиб келиши мумкин.

Эслатиб ўтамиз, 30 январь куни Дональд Трамп BRICS давлатлари халқаро тўлов воситаси сифатида АҚШ долларидан воз кечса, 100 фоизлик божлар жорий қилиш билан таҳдид қилганди.