Хитой Трампга ўзининг услубида жавоб қайтарди

Бугун, 4 февраль куни Хитой ҳукумати бир қатор Америка товарларига бож жорий этилишини эълон қилди. Бу ҳақда “Associated Press” хабар берди.

Пекиннинг қарори АҚШнинг янги маъмуриятининг Хитойдан келадиган товарларга божларни ошириш режаларига жавоб бўлди.

Хитой Савдо вазирлиги кўмир ва суюлтирилган газга 15 фоизлик, шунингдек, нефть хомашёси, қишлоқ хўжалиги техникаси ва бир қатор транспорт воситаларига 10 фоизлик бож тўлови жорий этилишини эълон қилди. Вазирлик ўз қарорини изоҳлар экан, АҚШнинг “бир томонлама тарифларни ошириши Жаҳон Савдо Ташкилоти қоидаларини жиддий бузаётганини” таъкидлаб, “Хитой ва АҚШ ўртасидаги нормал иқтисодий ва савдо ҳамкорлигига зарар етказаётганини” таъкидлади.

Қайд этиш жоиз, АҚШ Президенти Дональд Трамп Хитойдан импорт қилинадиган маҳсулотларга 10 фоизлик бож жорий этишни буюрган эди. Қарор бугун, 4 февраль куни кучга кириши керак эди. Трамп эса яқин бир неча кун ичида Хитой раҳбари Си Цзиньпин билан музокаралар ўтказишни режалаштирган.

Маълумки, Хитой АҚШнинг 47-Президенти маъмурияти февраль ойидан савдо тарифларини жорий этишга қарор қилган ягона давлат эмас. Трамп аввалроқ Канада ва Мексикадан импорт бўйича тегишли буйруқларни имзолаган эди. Бироқ, кеча, 3 февраль куни, тарифлар кучга киришидан бироз олдин, Трамп ва Мексика Президенти Клаудия Шейнбаум ўртасида келишувга эришилгани маълум бўлди.

АҚШ Президенти тарифларни жорий қилишни бир ойга кечиктиришга рози бўлди, бунга жавобан Мексика ўзининг шимолий чегарасини 10 минг Миллий гвардия қўшинини жойлаштиришга қарор қилди.

Трамп ижтимоий тармоқларда бу ҳаракатга сабаб сифатида чегарадан ноқонуний гиёҳванд моддалар, хусусан фентанил оқимини тўхтатиш зарурлигини кўрсатди. Шеинбаум эса келишув АҚШнинг Мексикага ноқонуний қурол савдосининг олдини олиш бўйича чоралар кўриш мажбуриятини ўз ичига олганини айтди.

Кейинчалик Оттава билан ҳам шундай келишувга эришилди. Трамп кеча, 3 февраль куни кечқурун Канадага тарифлар ҳам 30 кунга кечиктирилишини айтди.

“Канада АҚШнинг шимолий чегарасини ҳимоя қилишга ва ниҳоят, мамлакатимизга кириб келган, юз минглаб америкаликларни ўлдирган, бутун мамлакат бўйлаб оилалар ва жамоаларни вайрон қилган фентанил каби ўлимга олиб келадиган гиёҳвандлик балосига чек қўйишга рози бўлди”, деб ёзди Трамп ўзининг TruthSocial ижтимоий тармоқларида.

Канада 1,3 миллиард долларлик чегара назорати режасини амалга ошириб, чегарага 10 мингга яқин чегарачини жойлаштирмоқда.

“Қўшма Штатлар ва Канада уюшган жиноятчилик, фентанил ва пул ювишга қарши курашиш учун АҚШ-Канада қўшма зарба кучларини жойлаштириш учун биргаликда ишлайди”, деди Трамп.

Президент, шунингдек, Қўшма Штатларнинг учта энг йирик савдо шеригига нисбатан тарифлар қисқа муддатда америкаликлар учун оғриқли бўлиши мумкинлигини тан олди ва узоқ муддатда дунёнинг деярли ҳар бир давлати Қўшма Штатларни талон-торож қилганини қўшимча қилди.