Санкция асорати: халқаро платформаларда рубль “қулади”

Халқаро савдоларда рубль тарихий энг паст даражага тушиб, доллар ва еврога нисбатан ўз қийматининг 30 фоиздан ортиғини йўқотди. Москва биржаси очилиши маҳаллий вақт билан соат 10:00 га қолдирилди. Пул бозорида ва валюта репоси бўйича ҳисоб-китоблар амалга оширилмаслиги эълон қилинди.

Бугун, 28 февраль куни Халқаро платформаларда доллар курси ўзининг энг юқори чўққисида 117 рублдан, евро курси 132 рублдан ошди. “Bloomberg” маълумотларига кўра, бу тарихий максимал пасайишдир. Москва вақти билан эрталаб соат 6:30 дан бери евро 127 рублдан, доллар 114 рублдан юқори нархда сотилмоқда. 

Котировкаларнинг ўсиши Европа Иттифоқининг Россия банкига қарши санкциялари эълон қилинганидан кейин содир бўлди. Европа Иттифоқи Кенгаши Марказий банкнинг валюта захиралари билан ҳар қандай операцияларни тақиқлади.

Эслатиб ўтамиз, бугун Беларусь чегарасида Украина расмийлари Россия делегацияси билан учрашиб, тинчлик музокараларини ўтказиши керак.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.

Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.

Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.