Россиялик икки миллиардер урушга қарши чиқди

Олам

image

Россияда ҳам, Украинада ҳам активлари бор тадбиркор Михаил Фридман минтақадаги можарога барҳам берилишига умид билдирди. Унинг Лондонда жойлашган LetterOne инвестиция компанияси ходимларига ёзган мактуби “Financial Times” нашри томонидан эълон қилинди.

“Ушбу инқироз инсонларнинг ҳаётига зомин бўлади ва юзлаб йиллар давомида биродар бўлиб келган икки халқга зарар етказади. Мен украин ва рус халқларига қаттиқ боғланганман ва ҳозирги можарони иккаласи учун ҳам фожиа деб биламан”, деб ёзади тадбиркор.

Унинг таъкидлашича, бу сиёсий баёнот эмас, балки Россия ва Украинадаги минглаб ходимлар учун масъул бизнесменнинг фикри.

Фридманнинг таъкидлашича, унинг истаги Украинадаги бу вазиятга чек қўйишдир. 

“Ишончим комилки, менинг ҳамкорларим ҳам шундай фикрда”, дея унинг сўзларини келтиради FT.

Бошқа бир россиялик миллиардер Олег Дерипаска ҳам тинчлик жуда муҳим эканини айтиб, музокаралар олиб боришга чақирган. Бу ҳақда ўзининг ижтимоий тармоқдаги саҳифасида ёзиб қолдирган.

 

Михаил Фридман россиялик тадбиркор, миллиардер, совет металлургия ишлаб чиқариш муҳандиси. “Альфа-Групп” консорсиумининг ҳаммуаллифи ва кузатув кенгаши раиси, VimpelCom Ltd. кузатув кенгаши аъзоси, Россия саноатчилар ва тадбиркорлар иттифоқи бошқаруви бюроси аъзоси, Россия Европа конгресси президиумнинг асосчиси ва бюроси аъзоси.

Россиялик тадбиркор Олег Дерипаска “Basic Element” компанияси асосчиси ва кузатув кенгаши раиси. Шунингдек, у “Русал” ва EN+ Group бирлашган компанияси раҳбари. Россия алюминий компанияси директорлар кенгаши раиси, Сибир алюминий компанияси президенти, Саяногорск алюминий заводи бош директори ҳисобланади. Унинг бойлиги 2,93 млрд долларга баҳоланган.

Аввалроқ "Bloomberg" агентлиги Россия Украинага уруш бошлаган кунда россиялик миллиардерлар 39 мрлд доллар йўқотгани ҳақида хабар берганди. Энг кўп пул йўқотларга орасида Дерипаска ҳам бор эди.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.

Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.

Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.


Мақола муаллифи

Теглар

Россия-Украина уруши Украинага босқин

Баҳолаганлар

115

Рейтинг

3

Мақолага баҳо беринг

Дўстларингиз билан улашинг

online_predictionLive

Барчасиcall_made