Россия ва Украина раҳбарларининг учрашуви муҳокама қилина бошлади – Зеленский

Украина Президенти Владимир Зеленскийнинг айтишича, Киев ва Москва музокарачилари унинг Россия Президенти Владимир Путин билан эҳтимолий шахсий учрашувини муҳокама қила бошлаган. Бу ҳақда Зеленский бугун, 25 июль куни Киевда журналистлар билан учрашувда маълум қилди.

“Биз урушга чек қўйишимиз керак ва бу, эҳтимол, шундай учрашувдан бошланади”, деди Президент

Унинг сўзларига кўра, ҳозирда бундай учрашувнинг формати муҳокама қилинмоқда ва бу борадаги музокараларда ҳозирданоқ маълум ютуқлар мавжуд.

Икки кун аввал Истанбулда бўлиб ўтган Москва ва Киев ўртасидаги тўғридан тўғри музокараларнинг учинчи раундида Украина август ойида янги, аммо энг юқори даражада учрашув ўтказишни таклиф қилган эди. Шундай қилиб, Киевнинг фикрича, Россиянинг Украинага қарши урушида тинчлик келишувига эришиш учун АҚШ Президенти Дональд Трамп томонидан Москвага берилган 50 кунлик муддатга амал қилинади.

Путиннинг матбуот котиби Дмитрий Песков эса 24 июль куни Россия ва Украина Президентларининг учрашуви “бу музокаралар натижалари қайд этилиши учун барча ишлар амалга оширилганидан” кейингина мумкин бўлишини айтди. Шу муносабат билан Кремль давлат раҳбарларининг август ойи охиригача учрашиши даргумон, деб ҳисобламоқда.

Россия ва Украина делегациялари ўртасидаги тўғридан тўғри музокараларнинг учинчи раундини шарҳлар экан, Песков фақат Россия Федерацияси у ерда ўзининг конструктив кун тартибини белгилаб берганини таъкидлади, “бу эса мазмунли ишларга йўналтирилган ва аниқ натижаларга эришишга олиб келиши мумкин”.

23 июль оқшомидаги музокараларнинг учинчи раундида Украина делегациясига Миллий хавфсизлик ва мудофаа кенгаши котиби Рустем Умеров бошчилик қилди. Россия делегацияси раҳбари этиб яна Россия Президенти ёрдамчиси, Россия тарихи дарсликлари муаллифи Владимир Мединский тайинланди. Учрашув тахминан 40 дақиқа давом этди. ТАСС агентлиги хабарига кўра, томонлар ҳарбий ва фуқаролик ходимларини алмашиш бўйича келишиб олган.