Кремль Путин ва Зеленский учрашуви учун шартларни маълум қилди

Россия ва Украина ўртасидаги музокаралар мазмунли бўлиши керак ва ҳар томонлама тайёргарликдан сўнггина икки давлат раҳбарларининг эҳтимолий учрашуви ҳақида гапириш мумкин бўлади. Бу ҳақда Россия Президенти матбуот котиби Дмитрий Песков бугун, 24 июль куни маълум қилди.

Кеча, 23 июль куни Истанбулда бўлиб ўтган музокараларнинг учинчи раунди якунларини шарҳлар экан, матбуот котиби Кремль маслаҳатлашувларнинг навбатдаги раундидан муваффақият кутмаганини таъкидлади.

“Бироқ, гуманитар кун тартибини муҳокама қилиш фактини, шунингдек, Россиянинг онлайн мулоқот формати учун ишчи гуруҳларини яратиш таклифини ижобий баҳолаш керак”, деди у.

Песков Россия томони ўзига хос ва мазмунли кун тартибини таклиф қилганини, энди асосий эътиборни конструктив ишларга қаратиш муҳимлигини таъкидлади.

“Россия ва Украина Президентларининг олий даражадаги учрашуви ҳақида суҳбат фақат жиддий ишлар амалга оширилгандан кейингина ўтказилиши мумкин”, дея қўшимча қилди у.

Бундай учрашувни август ойи охиригача ўтказиш имкониятини изоҳлар экан, Песков зарур тайёргарлик ҳажмини ҳисобга олиб, “бу масофани бир сакрашда қандай босиб ўтишни” тасаввур қилиш қийинлигини айтди.

Бундан ташқари, Песков Кремль “Украина ҳудудида ушлаб турилган тинч аҳоли” тақдиридан хавотирда эканини айтди.

“Уларнинг кўплари амалда гаровда қолмоқда”, деди у.

Унинг сўзларига кўра, Россия ҳарбийлари “Россия ҳудуди хавфсизлигини таъминлаш учун Украина билан чегарада буфер зоналар яратиш учун барча зарур чораларни кўрмоқда”.

Ғарб давлатлари билан ўзаро алоқалар ҳақида гапирар экан, Кремль вакили, агар керак бўлса, Вашингтон билан алоқани зудлик билан ташкил қилиш мумкинлигини таъкидлади.

Шу билан бирга, Песков Россия Президенти Владимир Путин ва АҚШ Президенти Дональд Трампнинг Хитойда бўлиши мумкин бўлган учрашуви бўйича аниқ муҳокамалар ўтказилмаганини айтди.

“Кремлда Оқ уйнинг амалдаги раҳбарининг Хитойга бориш режалари ҳақида ҳам маълумот йўқ”, деди Песков.

Эслатиб ўтамиз, кеча, 23 июль куни Истанбулда Россия Федерацияси билан тинчлик музокараларида қатнашган Украина делегацияси раҳбари Рустам Умаров учрашув якунлари бўйича ўтказилган матбуот анжуманида Киев Россия томонига Россия Президенти Владимир Путин ва Украина Президенти Владимир Зеленский ўртасидаги учрашувни август ойи охиригача ўтказишни таклиф қилганини айтганди.

АҚШ ва Россия Президентларининг учрашуви ҳақида эса Британиянинг “The Times” газетаси Дональд Трамп сентябрь ойи бошида Хитой раҳбари Си Цзиньпин ва Россия етакчиси Владимир Путин билан учрашиш учун Пекинга таклиф қилиниши мумкинлигини хабар қилганди. Песковнинг ўзи ҳам Трамп кузда Америка компаниялари раҳбарлари билан Хитойга ташриф буюрса, у ерда Россия Президенти Владимир Путин билан учрашиши мумкинлигини айтганди. Трамп эса 22 июль куни филиппинлик мавқедоши кичик Фердинанд Маркос билан Оқ уйда бўлиб ўтган учрашувда яқин келажакда Хитойга ташриф буюриши мумкинлигини тан олди, бироқ у ерда Путин учрашув ўтказиш имкониятини на инкор этди, на тасдиқлади.