Россия Украинанинг қайси ҳудудларини қўшиб олиш ниятида экани маълум бўлди

Украинанинг Херсон вилояти ҳамда тан олинмаган Луганск ва Донецк халқ республикалари назоратидаги ҳудудлар Россия таркибига киради, Запорожье вилояти билан ҳам худди шундай бўлади, вазият имкон берган заҳоти референдум ўтказилади. “Ягона Россия” партияси Бош кенгашининг котиби Андрей Турчак РИА Новостига берган интервьюсида шундай фикр билдирди.

“Қарорни аҳолининг ўзи қабул қилиши керак ва ишончим комилки, улар буни қабул қиладилар. Шунинг учун мен бу минтақа Россия Федерацияси таркибига киришига шубҳа қилмайман. Одамлар Бандера террори Ғарб томонидан қонунийлаштирилган саккиз йил ўтиб ҳимоя, барқарорликни хоҳлайдилар, улар учун узоқ кутилган ва мустаҳкам тинчлик келди”, дея Россиянинг Украинадаги босқинчилик ҳаракатини озодлик юришидек таърифлаган Турчак.

Сиёсатчи Донецк ва Луганск вилоятларининг Украинадан тортиб олинган ҳудудлари ҳақида гапириб, шак-шубҳасиз улар ҳам Россияга қўшилишини таъкидлади. Унинг фикрича, Запарожье вилояти ҳам бу қарорни қўллаб қувватлайди.

“Вазият бўлиши билан, ўқ отиш тўхтаб, хавфсизлик зонаси пайдо бўлиши биланоқ референдум ўтказилиши керак. Ҳамма нарсанинг ўз вақти бор. Ишончим комилки, Запорожье аҳолиси ҳам бундай қарорни қўллаб-қувватлаш учун ўз фикрларини билдиради”, деган ҳукмрон “Ягона Россия” Бош кенгаши котиби келгусидаги режалар ҳақида гапириб.

Қайд этиш керакки, Россия Украинадаги ҳарбий ҳаракатлар давомида Херсон вилоятини тўлиқ, Запорожье вилоятининг Азов денгизига туташ қисмини эгаллади. Ҳудудларда Россияга бўйсунувчи ҳарбий маъмурият шакллантирилди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.