Россия Украинанинг қанча донини олиб кетгани айтилди

Олам

image

Руслар Украинанинг вақтинча босиб олинган ҳудудларидан ярим миллион тоннага яқин донни олиб кетишган. Бу ҳақда Украина Аграр сиёсат ва озиқ-овқат вазирининг биринчи ўринбосари Тарас Висоцкий миллий телемарафон эфирида маълум қилди, деб хабар берди УНИАН.

“Ҳудудлардан, хусусан, вақтинча босиб олинган ҳудудларда жойлашган элеваторлардан олинган маълумотларга кўра, ярим миллион тоннага яқин дон ўғирланган. Бу вақтинча босиб олинган барча вилоятлар – Херсон, Запорожье, Луганск, Донецкда”, дейди вазир ўринбосари.

Унинг сўзларига кўра, руслар 2021 йилнинг кузида украиналик фермерлар тинчлик даврида эккан янги кузги буғдойнинг донини ҳам ўғирлаш хавфи катта.

“Умид қиламизки, жанубий вилоятларда бир неча ҳафтадан сўнг ўрим-йиғим бошланишидан олдин бу ҳудудларда ҳам ғалаба қозониб, деоккупация қилишга муваффақ бўламиз, чунки бошқа шароитда босқинчиларнинг хатти-ҳаракати бу нонни тўғридан-тўғри ўғирлаш эҳтимолидан дарак беради”, деди Висоцкий.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

58

Рейтинг

3.1

Мақолага баҳо беринг

Дўстларингиз билан улашинг