Россия Украинага ҳужумнинг биринчи босқичини якунлади – Шойгу

Россиянинг Украинага ҳужуми натижасида Киев қўшинлари “катта зарар кўрди”. Россия ҳарбийлари Украинага ҳужум операциясининг биринчи босқичининг асосий вазифаларини бажарди. Бу ҳақда Россия Мудофаа вазири Сергей Шойгу маълум қилди. 

“Украина қуролли кучлари катта зарар кўрди. Ҳаво устунлиги қўлга киритилди. Ҳарбий ҳаво кучлари ва ҳаво ҳужумига қарши мудофаа тизими амалда йўқ қилинди. Мамлакат ҳарбий-денгиз кучлари фаолиятини тўхтатди. Қуруқликдаги барча тузилмалар катта йўқотишларга учради”, дейди Шойгу. 

Мудофаа вазирлиги раҳбарининг сўзларига кўра, Украинанинг 152 та самолётидан 123 тасини, 149 та вертолётидан 77 тасини, 180 та узоқ ва ўрта масофага мўлжалланган зенит-ракета мажмуасидан 152 таси йўқ қилинган. 

Шойгунинг таъкидлашича, Россия қўшинлари Украинага ҳужум операциясининг биринчи босқичининг асосий вазифаларини бажарган.

“Украина Қуролли Кучларининг жанговар салоҳияти сезиларли даражада камайди, бу энди асосий эътибор ва асосий саъй-ҳаракатларни Донбассни озод қилишга қаратиш имконини беради”, дейди вазир.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.