Россия Украинада $5,1 млрдлик техникасини йўқотди – “Forbes”

Россия Украинадаги урушда умумий қиймати 5,1 млрд доллардан ортиқ бўлган техникаларини йўқотди. Бу ҳақда “Forbes” ўз ҳисобларига асосланиб, хабар берди.

Пул билан ҳисоблаганда умумий йўқотишларнинг 47 фоизи самолётлар ва вертолётларга, 29 фоизи танкларга, 14 фоизи зирҳли жанговар машиналарга тўғри келган.

Хусусан, йўқ қилинган танклар Россияга 1,5 миллиард доллар, зирҳли жанговар машиналар эса 700 миллион долларга тушган. Йўқотилган самолётлар ва вертолётларнинг суммаси биргаликда 2,4 миллиард долларни ташкил қилган.

Бироқ, бу миқдор тахминий. Негаки, руслар Украинага қарши урушда турли маркадаги техникалардан фойдаланмоқда. Самолётларга келсак, украиналиклар 11 миллион доллар турадиган Су-25 самолётини уриб туширган ҳолатлар мавжуд. Шу билан бирга, Украина ҳарбийларининг ўлжасига айланган Су-30 33 миллион доллар, Су-34 эса 36 миллион доллар туради.

Уриб туширилган энг қиммат техника иккита йирик Ил-76 ҳарбий-транспорт самолётидир. Улардан бири Василков яқинида, иккинчиси Кропивницкий яқинида уриб туширилган. Уларнинг ҳар бири 86 миллион долларга баҳоланган.

Танкларга келганда, Forbes нархларни очиқ манбалардан олган. Битта танк журналистлар томонидан 4 миллион долларга баҳоланган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.