Россия қўшинлари Киевга юриш бошлади
Олам
−
25 Февраль 2022
19107Россия қўшинлари Украина бўйлаб Киев томон ҳаракатланмоқда. Бу ҳақда Украина Мудофаа вазири ўринбосари Анна Маляр ижтимоий тармоқдаги саҳифасида маълум қилди.
“Россия ҳарбийлари Украина қуролли кучларининг иккита автомобилини эгаллаб, украиналик ҳарбийлар формасини кийиб, Оболон томондан Киев марказига тезликда ҳаракатланаётган иккита автомашинасини қўлга олди. Улар ортидан Россия ҳарбий юк машиналари карвони кетмоқда”, деб ёзди у Facebook’да. Бироз вақт ўтгач, Маляр постни “Зарарсизлантирилган” ибораси билан ўзгартирди.
Ички ишлар вазиримаслаҳатчиси Антон Герашченко эса бугун энг оғир кун бўлишини, душманнинг режаси Иванков ва Чернигов томондан Киевга танк колонналари билан бостириб кириш эканини таъкидлаган.
УНИАН маълумотларига кўра, 25 февраль куни эрталаб рус танклари ва техникалари карвони Иванково қишлоғидан Киев йўналиши бўйлаб (шаҳардан 80 километр узоқликда) йўл олган. Аввалроқ Россия зирҳли техникаларини тўхтатиш учун қишлоқ яқинида кўприк портлатиб юборилгани хабар қилинганди.
Киев яқинидаги Вишгородда, жума куни эрталаб артиллерия ўқлари товушлари эшитилган. Шунингдек, Россия ҳарбий техникасининг Суми вилоятидаги ҳаракати ҳақида ҳам маълум қилинган.
Бугун эрталаб Киевда яна хавф сигнали чалинди, аҳолидан зудлик билан бошпана топиш сўралди.
Россия Федерацияси Мудофаа вазирлиги ҳозирча Украинадаги мавжуд вазиятга изоҳ бермади.
Россиянинг Украинага босқини
Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.
Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.
24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.
Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.
Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.
Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.
Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.
25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.
LiveБарчаси
Бухорода Ғиждувон деҳқон бозори ёнмоқда.
14 Декабрь