Расман! ЕИ Россияга қарши санкцияларнинг “еттинчи пакети”ни тасдиқлади

Олам

image

Европа Иттифоқи Россиядан олтин олиб киришни тақиқлашни ўз ичига олган еттинчи санкциялар пакетини маъқуллади. Бу ҳақда Литванинг Европа Иттифоқидаги доимий вакили Арнольдас Пранцкявичюс маълум қилди.

“Европа Иттифоқи давлатларининг доимий вакиллари қўмитасида биз ҳозиргина Россияга қарши санкцияларнинг янги пакетини маъқулладик. Янги санкциялар пакетига олтинни тақиқлаш, янги экспорт назорати ва “Сбербанк” активларини музлатиш ҳам киритилган”, дейди у.

Пранцкявичюсга кўра, чекловлар 50 дан ортиқ жисмоний ва юридик шахсларга хам тегишли бўлади.

“Янги санкциялар ракети 21 июль куни кучга киради. Уларни тасдиқлаш тартиби эртага якунланади”, дейилади Чехиянинг Европа Иттифоқидаги ваколатхонаси маълумотида. 

Июнь ойининг бошида Европа Иттифоқи Россияга қарши санкцияларнинг олтинчи пакетини расман жорий қилган эди. Унда асосий чора Россиядан нефть етказиб беришга қисман эмбарго қўйиш бўлди. Тақиқ “Дружба” қувури орқали етказиб бериладиган хомашёни ўз ичига олмади. ЕИ давлатлари олти ой ичида Россия нефтидан, саккиз ой ичида нефть маҳсулотларидан воз кечишга келишиб олганди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин еттинчи санкциялар пакети

Баҳолаганлар

20

Рейтинг

3.2

Мақолага баҳо беринг

Дўстларингиз билан улашинг