Путин оддий масалаларда ҳам музокарадан қочяпти – Германия ТИВ

Олам

image
0:00
0:00
download

Германия Ташқи ишлар вазири Анналена Бербок Украинани Россия агрессиясига қарши курашда қўллаб-қувватлаш учун унга қурол етказиб беришни давом эттиришга чақирди. У Берлинда кеча, 21 август куни Федерал ҳукуматнинг Очиқ эшиклар куни муносабати билан ўтказилган нутқида Россия Президенти Владимир Путинни танқид қилди, дея хабар бермоқда dpa агентлиги.

Бербокнинг сўзларига кўра, Путин халқаро гуманитар ҳуқуқ соҳасидаги ҳамкорлик каби умумий масалалар бўйича ҳам музокаралар олиб боришдан бош тортади, шунингдек, бошқа мамлакатларни можарони ҳал қилишда воситачи сифатида қабул қилишдан ҳам бош тортяпти. Вазир йиғилиш иштирокчиларидан бирининг Германия ҳукумати Россиянинг Украинага қарши урушини ҳарбий эмас, дипломатик йўл билан тугатишга ёрдам бериш учун нима қиляпти, деган саволига шундай жавоб берди.

Бербокнинг таъкидлашича, ҳозирча музокаралар йўли билан урушни тугатишнинг иложи бўлмагани учун Германияда танлаш имконияти бор: ё ҳеч нарса қилмай, қўл қовуштириб ўтириш ёки русларнинг келгусидаги олдинга силжишларини тўхтатиш учун ҳарбий жиҳатдан қўллаб-қувватлаш. Ҳозирги вазиятда у украиналикларга ҳарбий ёрдам кўрсатиш “қанчалик даҳшатли бўлмасин” Германия борадиган ягона йўл деб ҳисоблайди.

Бербокнинг сўзларига кўра, бу вазиятда “миллионлаб одамларни шунчаки ўз тақдирига топшириш”гина муқобил бўлади ва Германия “бундай масъулиятни ўз зиммасига олмайди”.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

22

Рейтинг

3.1

Мақолага баҳо беринг

Дўстларингиз билан улашинг