Путин Миср Президентига Украинадаги “операция”нинг сабабларини айтди

Россия Президенти Владимир Путин кеча, 9 март куни Миср Президенти Абдулфаттоҳ ас-Сиси билан телефон орқали суҳбатда Украинадаги вазиятни муҳокама қилди. Бу ҳақда Кремль матбуот хизмати хабар берган.  

“Абдулфаттоҳ ас-Сисининг илтимосига кўра, Владимир Путин Донбассни ҳимоя қилиш бўйича Россия махсус ҳарбий операциясининг сабаблари ва мақсадлари ҳақида гапирди ҳамда Украина вакиллари билан музокараларда Россия олиб бораётган ишлар ҳақида маълумот берди. Миср Президенти Россия томонига Миср фуқароларини можаро ҳудудидан эвакуация қилиш бўйича олиб борилаётган саъй-ҳаракатлар учун миннатдорлик билдирди”, дейилади хабарда. 

Қайд этилишича, Путин ва Миср Президенти туризм ва қишлоқ хўжалиги соҳаларида ҳамкорликни давом эттиришдан манфаатдор эканликларини билдирган. Суҳбат чоғида Россия ва Миср ўртасидаги стратегик шерикликни янада ривожлантириш, жумладан, атом энергетикаси ва саноат соҳасида йирик қўшма лойиҳаларни амалга ошириш масалалари муҳокама қилинган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.