“Душман Киевга ўз қўғирчоқларини қўймоқчи” – Зеленский яна халқига мурожаат қилди

Украина Президенти Владимир Зеленский Украина армияси ва халқи “худди босиб олинган Донецкдаги каби Киевга қўғирчоқлар қўймоқчи бўлган Россия Федерацияси ҳукуматининг режасини бузган”ини айтди. 

Давлат раҳбари Facebook ижтимоий тармоғида видеомурожаат қилди. 

“Мен бу мурожаатни хушхабар билан бошлашим мумкин: биз омон қолдик! Ва биз душман ҳужумларини муваффақиятли қайтарамиз. Давлатимизнинг кўплаб шаҳар ва туманларида жанглар давом этмоқда, лекин биз биламизки, биз ватанни, ерни, болалар келажагини ҳимоя қиламиз. Киев ва пойтахт атрофидаги муҳим шаҳарлар бизнинг армиямиз томонидан аниқ назорат қилинади. Босқинчилар давлатимиз марказини тўсиб, Донецкдагидек қўғирчоқларини бу ерга қўймоқчи бўлди. Биз уларнинг режасини буздик. Улар биздан ҳеч қандай устунликка эриша олишмади”, дейди давлат раҳбари. 

Зеленскийга кўра, Москва энергия объектларини йўқ қилишга ҳаракат қилиб, аёр тактикани қўлламоқда. 

"Бизнинг кўчаларимизда, Киев осмонида, Василковда, Вишгородда, ҳатто, унинг атрофидаги далаларда ҳам Киев учун ҳақиқий жанг давом этди. Душман бизга қарши ҳамма нарсани ишлатди: ракеталар, қирувчилар, дронлар, артиллерия, зирҳли техника, диверсантлар ва десант. Босқинчилар турар-жой ҳудудларига ракета артиллериясидан зарба беришмоқда. Улар энергия объектларини йўқ қилишга ҳаракат қилмоқдалар. Уларнинг жуда айёр тактикаси бор. Ракета ва артиллерия томонидан вайрон қилинган турар-жой бинолари биз билан бирга босқинчиликни тўхтатиш учун дунёнинг сўнгги аргументидир”, дейди Президент.

Давлат раҳбари урғулаганидек, бугун, 26 февраль тонгида Россия қуролли кучлари Киевдаги кўп қаватли уйга ракета билан ҳужум қилди. Даҳшатли фожиада 6 киши жароҳатланган, 6 та хонадон бутунлай йўқ бўлиб кетган. 

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.

Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.

Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.