Бу ёз Европа учун энг фожиалиси бўлиши мумкин – Зеленский

Олам

image

Агар Россиянинг радиациявий шантажи давом этса, бу ёз Европа тарихига барча даврларнинг энг фожиали ёзларидан бири сифатида кириши мумкин. Украина Президенти Владимир Зеленский анъанавий видеомурожаатида шундай фикр билдирди.

“Агар Россиянинг радиациявий шантажи давом этса, бу ёз Европанинг турли мамлакатлари тарихига барча даврларнинг энг фожиали ёзларидан бири сифатида кириши мумкин. Зеро, дунёнинг бирорта атом электр станциясидаги биронта ҳам қўлланмада террористик давлат атом электр станциясини нишонга айлантирган тақдирда қандай ҳаракатланиш тартиби назарда тутилмаган”, деган Зеленский.

Президентнинг айтишича, украиналик дипломатлар, шериклар, БМТ ва МАГАТЭ вакиллари Запорожье атом электр станциясига юбориладиган миссиянинг аниқ тафсилотларини ишлаб чиқмоқда.

“Ушбу миссия билан Запорожье АЭС ва Энергодарда тўлиқ хавфсизликни тиклаш бошланиши мумкин. Мен эса бу иш ва ташаббусга қўшилган барчага ўз миннатдорлигимни билдираман”, дея қўшимча қилган у.

Президентнинг сўзларига кўра, “бугунги кунда Россиянинг энергетика соҳасидаги шантажининг яна бир жиҳатига эътибор қаратиш лозим”.

“Шимолий оқим”дан Германияга газ етказиб бериш яна чекланди ва яна “Шимолий оқим 2” билан гўёки бирор нарсанинг ўрнини қоплаш мумкинлиги ҳақида бемаъни гаплар эшитиляпти. Россияга бу оқимлар фақат Европани муаммолар билан таъминлаш учун керак, у ерда кимгадир газ билан ёрдам бериш учун эмас. Ҳозир бу кундек равшан бўлди”, дейди у.

Зеленскийнинг сўзларига кўра, Россия Федерацияси Европа ва жаҳон энергетика бозорида қанча узоқ қолса, шунчалик узоқ вақт у ерда барқарорлик бўлмайди.

“Европадаги барча ўз энергия тизимини Россиядан умуман энергия олмасдан яшашга қанчалик тез тайёрласа, улар ҳар қандай қишдан тезроқ омон қолишади”, дейди Украина раҳбари.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

23

Рейтинг

3.2

Мақолага баҳо беринг

Дўстларингиз билан улашинг