Британия Украинага яна М270 тизимларини етказиб берди

Украина мудофаа вазири Алексей Резников Буюк Британиядан Украинага М270 ялпи реактив ҳужум тизимларининг (ЯРҲТ) янги партияси етказиб берилганини маълум қилди.

“Буюк Британия ваъда берди, Буюк Британия етказиб берди. Бундан ҳам кўпроқ М270 ЯРҲТ Украинага етиб келди. Тез орада янги “совғалар” келади”, деб ёзган у Twitter саҳифасида.

15 июль куни Резников Буюк Британиядан биринчи учта М270 ЯРҲТ олинганини эълон қилиб, яна қуроллар келишини айтганди.

Июнь ойида Буюк Британия Мудофаа вазири Бен Уоллес Лондон Америкада ишлаб чиқарилган М270 ЯРҲТни 80 кмгача бўлган масофадаги нишонларни урадиган ракеталар билан Украинага топширишини маълум қилганди. Кеча, 11 август куни “Reuters” агентлиги Уоллесга таяниб, Лондон Украинага қўшимча ЯРҲТ ҳамда М31А1 бошқариладиган ракеталарни етказиб беришини маълум қилди.

М270 ЯРҲТ – бу Америкада ишлаб чиқарилган реактив ва тактик ракета учириш мосламаси сифатида ишлатиладиган универсал учириш мосламаси.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.