Босиб олинган Херсон вилояти Россия таркибига “қўшилмоқчи”

Россия назоратига ўтган Херсон вилояти (Украина)нинг руспараст раҳбарияти Президент Владимир Путинга ҳудудни РФ таркибига қабул қилиш илтимоси билан мурожаат қилмоқчи. Бу ҳақда вилоят ҳарбий-фуқаролик маъмурияти раҳбари ўринбосари Кирилл Стремоусов маълум қилди. 

“Қримда мутлақо қонуний равишда ўтказилган референдум Россияни жаҳон ҳамжамиятининг тўлақонли субъекти сифатида қабул қилмаслик учун ҳамма нарсани қилган халқаро ҳамжамият томонидан қабул қилинмади”, деган у. 

Стремоусовнинг таъкидлашича, Херсон вилояти ҳокимияти йил охиригача Россияга субъект сифатида қўшилиш учун қонунчилик базасини тайёрлайди, бир вақтнинг ўзида қарор қабул қилинади.

“Россия Федерацияси субъектининг қонунчилик базаси йил охиригача тайёрланади. Ҳозирча, бизнинг режаларимизга кўра, Херсон вилояти ҳарбий-фуқаролик маъмурияти қарорлари асосида ҳаракат қилмоқда ва йил охиригача биз қандай бўлишимиз ҳақида қарор қабул қилинади”, деган у. 

Маълумот ўрнида, Кирилл Стремоусов провокатор, Украинага қарши ташвиқотчи ҳисобланади. Украинада уни ватан хоини деб аташган. У Херсон вилоятини босиб олишда рус армиясининг шериги бўлган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.