БМТ Украинадаги урушда қанча тинч аҳоли ўлганини очиқлади

Бирлашган Миллатлар Ташкилотининг Инсон ҳуқуқлари бўйича Олий комиссари бошқармаси Россия томонидан бошланган кенг кўламли уруш туфайли Украинада 5237 киши ҳалок бўлгани ва 7035 нафар тинч аҳоли жароҳатланганини тасдиқлашга муваффақ бўлди. Бу ҳақда БМТ ИҲОК маълум қилди.

Комиссарлик маълумоти 24 февралдан 24 июль ярим тунгача бўлган вақтдаги статистикани ўз ичига олган. Қурбонларнинг 348 нафари, жабрланганларнинг 560 нафари болалар экани тасдиқланган.

Июль ойида ташкилот тинч аҳолининг ўлими ёки жароҳати билан боғлиқ 1165 та ҳолатни қайд этган: 285 киши ҳалок бўлган ва 880 киши яраланган.

“Тинч аҳоли вакилларининг ўлими билан боғлиқ рўйхатга олинган ҳолатларнинг аксарияти кенг таъсир доирасига эга бўлган портловчи қуроллардан фойдаланиш, жумладан, оғир артиллерия ва кўплаб ракета тизимларидан ўққа тутилгани, шунингдек, ракета ва ҳаво зарбалари натижасида содир бўлган”, дейилади БМТ ИҲОК.

Уларнинг таъкидлашича, ҳақиқий рақамлар анча юқори, чунки жанглар қизғин давом этаётган айрим жойлардан маълумот олишда кечикиш кузатилмоқда. Бу, хусусан, Мариупоьл (Донецк вилояти), Изюм (Харьков вилояти), Лисичанск, Попасна ва Северодонецк (Луганск вилояти) аҳоли пунктларига тааллуқлидир.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.