Бир балоси бўлмаса... Россия ЕХҲТнинг Украинадаги миссияси ишига тўсиқ қўйди

Олам

image

Европада Хавфсизлик ва Ҳамкорлик Ташкилоти (ЕХҲТ) Россиянинг позицияси туфайли Украинадаги махсус кузатув миссияси ваколатини узайтира олмади. Бу ҳақда ЕХҲТ раиси, Польша Ташқи ишлар вазири Збигнев Рау маълум қилди.  

“Россия Федерацияси позицияси туфайли махсус кузатув миссияси ваколатини узайтириш бўйича келишувга эриша олмаганимиздан чуқур афсусдаман”, деган Рау ЕХҲТ сайтида чоп этилган баёнотда. 

Збигнев Раунинг айтишича, ЕХҲТ миссияси 2014 йил —Украинада ўз фаолиятини бошлаганидан бери ҳал қилувчи ролни ўйнаган, ҳудуддаги хавфсизлик ва гуманитар вазият ҳақида холис маълумот бериб, тинч аҳоли учун можаро оқибатларини юмшатишда тинимсиз меҳнат қилган.

Россиянинг ЕХҲТдаги доимий вакили Александр Лукашевич воқеани изоҳлар экан, Москва ташкилотни ўз ходимларини чақириб олиш тўғрисида хабардор қилишини айтган. Унинг сўзларига кўра, россиялик мутахассислар ЕХҲТнинг Украинадаги махсус кузатув миссиясидан “шунчаки сиқиб чиқарилган”. У, шунингдек, миссия Украинада “объектив режимда” ишламаганини даъво қилмоқда.

Маълумот ўрнида, ЕХҲТнинг махсус кузатув миссияси 2014 йилдан бери Донбассдаги можаро ҳудудида  ишлаб келган. Миссия Украинанинг ЕХҲТдаги ваколатхонаси илтимосига биноан тузилган, қарор ташкилотга аъзо 57 давлат томонидан маъқулланган. ЕХҲТ миссиясининг Украинадаги фаолияти ҳар йили узайтирилган. 2021 йилда миссия ваколати 2022 йил 31 мартгача узайтирилган. Унинг амал қилиш муддати бугун, 1 апрелга ўтар кечаси тугайди. 

Украинадаги миссия ЕХҲТнинг энг йирик миссияси ҳисобланган. Мамлакатда 814 нафар халқаро ва 477 нафар маҳаллий ходимлар ишлаган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

35

Рейтинг

3

Мақолага баҳо беринг

Дўстларингиз билан улашинг