АҚШ фуқароларини Ливандан эвакуация қилмоқчи

Америка Қўшма Штатлари Ливандаги “Ҳизбуллоҳ” ҳаракати ва Исроил армияси ўртасидаги муносабатлар янада кескинлашса, ўз фуқароларини Ливандан эвакуация қилиш режаларини ишлаб чиқди. Бу ҳақда “Тhe Wall Street Journal” нашри хабар берди.

Қайд этилишича, ишлаб чиқилаётган режаларда Ўртаер денгизи орқали Кипрга фуқаролик кемаларида 50 мингга яқин АҚШ фуқаросини Ливандан олиб чиқиш кўзда тутилган. АҚШ Давлат департаменти маълум қилишича, 2022 йил ҳолатига кўра, Ливанда 86 мингга яқин америкалик истиқомат қилмоқда.

АҚШнинг бундай қарорга келишига Ливаннинг турли ҳудудларида, жумладан, Байрутнинг жанубий чеккасида пейжерларнинг портлаши сабаб бўлган. Портлашлар турар-жой бинолари ва уяли телефон дўконларида ҳам содир бўлган.

Шунингдек, Ливан Алоқа вазирлиги Icom V82 радиостанцияси  портлаганини маълум қилди. Мамлакат Соғлиқни сақлаш вазирлигининг сўнгги маълумотларига кўра, портлашларнинг иккинчи тўлқини оқибатида 450 киши жароҳатланган, 20 киши ҳалок бўлган.

Эслатиб ўтамиз, 17 сентябрь куни Ливаннинг турли ҳудудларида “Ҳизбуллоҳ” аъзоларининг пейжерлари портлаган эди. Ҳодиса оқибатида 2,8 мингга яқин одам жароҳат олган, 12 киши ҳалок бўлган, улар орасида 10 ёшли қиз ҳам бор. Ливан хавфсизлик хизматидаги юқори мартабали манба ва бошқа суҳбатдошига таяниб, “Reuters” Исроилнинг “Моссад” разведка хизмати пейжер портлашларидан бир неча ой олдин Ливандаги “Ҳизбуллоҳ” ҳаракати томонидан буюртма қилинган Тайваннинг Gold Apollo компаниясининг 5000 пейжерига оз миқдорда портловчи моддалар ўрнатганини хабар берди. Gold Apollo компанияси эса “Ҳизбуллоҳ” томонидан буюртма қилинган пейжерларни ишлаб чиқаришга алоқаси йўқлигини айтди. Унга кўра, Будапештда рўйхатдан ўтган BAC Consulting KFT компанияси билан шартнома тузилган бўлиб, BAC Тайвань брендидан фойдаланиши мумкин, лекин маҳсулотни мустақил равишда ишлаб чиқаради. АҚШ Мудофаа вазирлиги ҳам Ливанда “Ҳизбуллоҳ” аъзолари томонидан фойдаланиладиган пейжерларнинг оммавий портлашига алоқадорлигини рад этди.

Кеча, 18 сентябрь куни эса Ливан шарқидаги Бекаа ҳудудида алоқа воситалари оммавий тарзда портлаб кетди. Ҳодиса оқибатида 3 киши ҳалок бўлган. 

Эртага, 20 сентябрь куни тушдан кейин Бирлашган Миллатлар Ташкилоти Хавфсизлик Кенгаши Ливандаги воқеаларни муҳокама қилиш учун фавқулодда йиғилиш ўтказади.