Зеленский Украинадаги уруш дунёга қандай хавф туғдиришини айтди

Олам 10826
image
-

Украинадаги уруш дунёнинг турли мамлакатларида очарчиликка олиб келиши мумкин. Бу ҳақда Украина Президенти Владимир Зеленский Италия парламенти депутатлари қаршисида видеоалоқа орқали сўзлаган нутқида айтиб ўтди.  

Зеленский очарчилик Украина ҳар доим энг йирик озиқ-овқат экспортчиларидан бири бўлгани сабабли содир бўлиши мумкинлигини тушунтирган.

“Қандай қилиб биз Россиянинг артиллерия ўқлари остида экишимиз мумкин?”, деган у.

Сиёсатчи италиялик парламентарийларни Россияга қарши Украинага ёрдам беришга чақирган. Унга кўра, Россия армияси Украина шаҳарларини вайрон қилиш ва тинч аҳолини йўқ қилишда давом этмоқда. 

Украина раҳбари бу уруш оқибатлари тез орада бутун дунёда сезилишидан огоҳлантирган. 

“Россия қўшинлари учун Украина у бостиришни хоҳлайдиган Европага кириш эшиги, аммо ваҳшийликка чек қўйиш керак”, дейди Зеленский. 

Аввалроқ, Италия Европа Иттифоқи санкциялари остида қолган россиялик олигархларнинг умумий қиймати 800 миллион евродан ортиқ активларини музлатиб қўйгани ҳақида хабар бергандик. 

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Рушана Султонова
Мақолага баҳо беринг
Баҳолаганлар: 50
Рейтинг: 2.9
t
×