Зеленский Россия билан Қрим ва Донбасс масаласини муҳокама қилиш эҳтимоли ҳақида гапирди

Россия Президенти Владимир Путин ахборот пуфагида қолмоқда. Украина Президенти Владимир Зеленский ABC News телеканалига берган интервьюсида шундай фикр билдирди.

“Путин ахборот пуфагида, у ўзи бошлаган урушни ўзи тугатиши мумкин”, деб ҳисоблайди Украина президенти.

Зеленскийнинг қўшимча қилишича, уни сайлаган халқ капитуляция ва ультиматумларни тан олмайди.

Украина раҳбари Россия билан ҳудудий масалаларни ҳам муҳокама қилиш мумкинлигини айтиб ўтган.

Зеленскийга Қримни Россиянинг бир қисми, ДХР ва ЛХРни мустақил республикалар сифатида тан олиш мумкинми, деган савол берилган.

"Биз Россиядан бошқа ҳеч ким тан олмаган, вақтинча босиб олинган ҳудудлар ва тан олинмаган республикалар билан боғлиқ масалаларни муҳокама қилишимиз мумкин, бу сохта республикалар, биз бу ҳудудларнинг келажакдаги тақдири бўйича муроса топишимиз мумкин. Мен учун энг муҳими, Украина таркибида бўлишни истовчи одамлар бу ҳудудда қандай яшашидир. Украинада ким уларни қабул қилмоқчи? Шундай экан, масала тан олишдан кўра анча мураккаброқ”, — деди Зеленский.

Аввалроқ Россия Украинадан ҳарбий фаолиятини тўхтатишни, конституциявий равишда нейтрал мақомини рўйхатдан ўтказишни, Қримни Россиянинг бир қисми сифатида тан олишни, шунингдек, Донецк ва Луганск халқ республикалари мустақиллигини талаб қилаётгани ҳақида хабар берган эдик.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.