Зеленский Макрон билан қарийб бир ярим соат телефонда “дардлашди”

Олам 4813
image

Бугун, 16 август куни Украина Президенти Владимир Зеленский Франция Президенти Эммануэль Макрон билан телефон орқали Запорожье атом электр станциясидаги вазият ҳамда Киевга молиявий ёрдам кўрсатиш масаласини муҳокама қилди. Бу ҳақда Зеленский ўзининг Twitter саҳифасида хабар берган. 

“Мен Эммануэль Макрон билан мулоқотни давом эттирдим. Францияга муҳим мудофаа ёрдами учун миннатдорлик билдирдим. Биз Украинага макромолиявий ёрдамни купайтириш ва озиқ-овқат хавфсизлиги соҳасидаги муаммоларни муҳокама қилдик”, дейди Зеленский.

Шунингдек, Украина Президенти Макронга жанговар ҳаракатлар бориши ва Запорожье атом электр станциясидаги вазият ҳақида ҳам маълумот берган. 

Елисей саройи Матбуот хизматига кўра, икки давлат раҳбарларининг суҳбати бир соат-у 20 дақиқа давом этган.

Маълумот учун, Макроннинг Зеленский билан аввалги суҳбати 1 август куни бўлиб ўтган эди. Ўшанда томонлар ғалла экспорти, Киевга молиявий ва ҳарбий ёрдам кўрсатилишини муҳокама қилган эди. 

Кейинроқ Зеленский Макрондан Европа давлатларидан макромолиявий ёрдамни кучайтиришда кўмак сўраганини қайд этди. 

Маълумот учун, Россия март ойи бошида ЗАЭСни эгаллаб олди, шундан кейин украиналик ходимлар станцияда ишлашда давом этди. 5 август куни украин матбуоти руслар ЗАЭСга тўрт марта ўқ узгани ҳақида хабар берди. Сўнгги кунларда электр станцияси мунтазам равишда ўққа тутилмоқда, бунда Россия ва Украина бир-бирини айбламоқда. Расмий Москвага кўра, Украина бўлинмалари томонидан Запорожье атом электр станциясининг ўққа тутилиши ядровий терроризм акти ва бу Чернобилдан ҳам каттароқ фалокатга олиб келиши мумкин.

Маълумот учун, Запорожье Европадаги энг йирик атом электр станцияси бўлиб, у Украинадаги барча электр энергиясининг чорак қисмини ишлаб чиқаради. Қарийб 6 минг мегаватт қувватга эга ушбу иншоот олтита энергия блокидан иборат. Ҳозирда атом электр станцияси тўлиқ қувватининг 70 фоизида ишлайди.

Аввалроқ, Европа Иттифоқи Киевга зарур бўлган вақтгача қурол етказиб беришни давом эттириш ниятида экани ҳақида хабар берган эдик.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Европа мамлакатлари аллақачон Россия нефтини етказиб беришни алмаштиришни бошлаган. Мисол учун, май ойининг охирида Бирлашган Араб Амирликлари икки йиллик танаффусдан сўнг Европага нефть етказиб беришни тиклади.

Юлдуз Абдурашидова
Мақолага баҳо беринг
Баҳолаганлар: 5
Рейтинг: 3.1
t
×