Трамп Зеленскийни яна Оқ уйга таклиф қилади (видео)

north_east

Дунё сиёсатчилари кимни қўлламоқда – Трамп ёки Зеленский?

АҚШ Президенти Дональд Трамп Украина Президенти Владимир Зеленский билан Овал кабинетда жанжаллашиб қолганидан кейин уни яна Оқ уйга таклиф қилишини айтди. Бу ҳақда у кеча, 11 март куни Оқ уй боғида ОАВ вакиллари билан суҳбатда журналистларнинг саволига жавобан маълум қилди.

Дональд Трамп Жиддадаги АҚШ ва Украина ўртасидаги сўнгги музокаралар бўйича изоҳ бераётганди. Ундан Украина Президенти Зеленский “Оқ уйга қайта таклиф қилинадими” деб сўрашди ва Трамп “Ҳа, мутлақо”, деб жавоб берди.

Шунингдек, у Россия ва Украина ўртасидаги жараён тўлиқ ўт очишни тўхтатишга олиб келишига умид билдирди: 

“Бу ерда биз тўлиқ ўт очишни тўхтатиш ҳақида гапиряпмиз. Украина буни қабул қилди ва умид қиламанки, Россия ҳам бу таклифни қабул қилади. Бугун ва эртага улар билан гаплашамиз ва келишувга эришамиз деган умиддамиз”.

АҚШ Президенти Дональд Трамп ва Украина Президенти Владимир Зеленский 28 февраль куни Овал кабинетда бўлиб ўтган учрашувда камералар олдида тортишди. Кейинчалик эълон қилинган қўшма матбуот анжумани бекор қилинди, Зеленский Оқ уйни ёлғиз қолдирди ва нодир қазилмалар бўйича битим имзоланмади.

Трамп Зеленский “Америка халқини ҳурмат қилмаслигини” таъкидлаган бўлса, Зеленский эса узр сўраш учун етарлича хато қилмаганини айтди.

4 март куни кечқурун Конгрессда сўзлаган Трамп, Зеленский унга Украина ноёб қазилмалар тўғрисидаги битимни имзолашга ва тинчлик музокараларини бошлашга тайёрлиги ҳақида мактуб юборганини айтди. АҚШ Президенти Дональд Трампнинг махсус вакили Стив Уиткофф эса “Fox News” телеканалида қилган чиқишида Зеленский Трампга йўллаган мактубида “узр сўраганини” айтди.

Бошқа томондан, АҚШ Марказий разведка бошқармаси директори Жон Ратклифф Трамп ва Зеленский ўртасидаги Овал кабинетдаги суҳбатдан сўнг улар бу мамлакатга разведка маълумотларини қўллаб-қувватлаш ва ҳарбий таъминотни вақтинча тўхтатганини тасдиқлади ва бу вақтинчалик чора эканлигини таъкидлади.

Эслатиб ўтамиз,  кеча, 11 март куни Жидда шаҳрида АҚШ ва Украина делегациялари музокара ўтказганди. Музокаралардан сўнг Украина Президенти девонининг раҳбари Андрей Ермак агар Россия худди шундай қадамга рози бўлса, Украина АҚШнинг 30 кунга ўт очишни тўхтатиш ҳақидаги таклифини қабул қилишга тайёрлигини билдирди. АҚШ Давлат котиби Марко Рубио ҳам Украинанинг ўт очишни тўхтатиш таклифини Россия томонига етказишларини ва “тўп энди россия майдонида” эканини айтди.