Энди тўп Россия майдонида – АҚШ бош дипломати

АҚШ Давлат котиби Марко Рубио Украинанинг ўт очишни тўхтатиш таклифини Россия томонига етказишларини айтди. Бу ҳақда у кеча, 11 март куни Саудия Арабистонининг Жидда шаҳрида АҚШ ва Украина делегациялари ўртасидаги музокаралар якунланганидан кейин матбуотга маълум қилди.

Россия-Украина урушининг боришини шарҳлар экан, Рубио “бу урушнинг ҳарбий ечими йўқ” эканини айтди. У урушни тугатиш ва АҚШ Президенти Дональд Трамп томонидан қўйилган тинч мақсадни амалга ошириш йўли музокаралар орқали ўтишини таъкидлади.

Давлат котибининг сўзларига кўра, бу айнан Трамп “кўрмоқчи бўлган” сценарий:

“Аммо биз музокаралар олиб боришимиздан олдин томонлар бир-бирига қарата ўқ узишни бас қилиши керак”, дейди у.

Унинг айтишича, Украина бунга рози, кейинги қадам буни Россия томонига етказиш бўлади. Рубио Россия томонига Украинанинг ижобий нуқтаи назари бўлган ўт очишни тўхтатиш таклифини етказишларини айтди:

“Умид қиламизки, улар “ҳа” деб жавоб беришади. Энди тўп руслар майдонида”, деди Рубио.

Маълумот учун, кеча, 11 март куни Жидда шаҳрида АҚШ ва Украина делегациялари музокара ўтказди. Украина делегацияси таркибида Президенти девони раҳбари Андрей Ермак, ташқи ишлар вазири Андрей Сибига, Мудофаа вазири Рустам Умаров ва Президенти девони раҳбарининг ўринбосари Павел Палиса иштирок этди. АҚШ делегацияси таркибида эса Давлат котиби Марко Рубио ва Президент Дональд Трампнинг миллий хавфсизлик бўйича ёрдамчиси Майкл Уолтц бор эди.

Эслатиб ўтамиз, музокаралардан сўнг Украина Президенти девонининг раҳбари Андрей Ермак агар Россия худди шундай қадамга рози бўлса, Украина АҚШнинг 30 кунга ўт очишни тўхтатиш ҳақидаги таклифини қабул қилишга тайёрлигини билдирганди.