Россиялик сенатор Украинадаги урушни қоралаган қизидан воз кечди

Олам

image
0:00
0:00
download

Россиянинг Ханти-Мансийск-Югра автоном округидан Федерация кенгаши сенатори Эдуард Исаков урушга қарши позицияни эгаллаган тўнғич қизи Дианани омма олдида рад этди. 

У қизи ҳақидаги ОАВ материалларига – “Медуза” ва BBC рус хизмати мақолаларига изоҳ берар экан Исаков Дианани “сотқин” деб атаган ва интервью учун пул мукофоти олганини тахмин қилган.

“У махсус ҳарбий операция ўтказилишига, ўз мамлакати сиёсатига қарши позициясини билдирмоқда. Афтидан, у бу оммавий ахборот воситаларидан пул олган, бошқача айтганда, у отасини, оиласини, Ватанини сотиб, Россияни тарк этган. Қизингиз сотқин бўлиб чиқса, сўз топиш қийин”, деган сенатор ўзининг Telegram-каналида.

Исаков шунингдек, Дианани уч ёшидан бери тарбияламаганини қўшимча қилган.

“Унинг Россияга қарши позицияси борлигини билганимдан бери биз алоқа қилмаймиз, мен уни таъминламайман, уй-жой бермайман. Мен ишга боради, катталардек ҳаёт бошлайди, катталар каби фикрлайди деб ўйлагандим. Ва у ўзини сенаторнинг қизи деб таништириб, интервьюсини сотиш орқали пул ишлашга қарор қилди”, деган Эдуард Исаков.

Ўз навбатида, “Медуза” нашри интервьюлар учун пул тўламаслигини, Диана билан ҳам шундай эканини маълум қилган.

Эслатиб ўтамиз, Россия Федерацияси кенгаши аъзоси Эдуард Исаковнинг 25 ёшли қизи Диана Исакова ижтимоий тармоқдаги саҳифасида Украинадаги урушга қарши эканини билдириб, Россияни тарк этганди. У урушга қарши позициясини билдириш учун мамлакатини тарк этган.

“Мамлакатимиз ҳақида нима деб ўйлаётганимни айта олмайман. 24 февралда уруш бошланди. Мен ўшанда бошдан кечирган ҳис-туйғуларимни етказиш жуда қийин. Бу даҳшатли эди. Қанақасига бундай бўлиши мумкин? Одам одамни ўлдиради ва бу ишни Россия қиляпти, мен буни қиладиган давлатда яшайман. Мен дастлабки икки кун жуда кўп йиғладим, мотам тутдим, гўё кимдир вафот этгандек, қайсидир қариндошимдан айрилгандек”, дейди Диана Исакова BBC билан суҳбатда.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

20

Рейтинг

3

Мақолага баҳо беринг

Дўстларингиз билан улашинг