Россия Европадан Киевга етказилган С-300 ЗРМни йўқ қилди

Россия Қуролли Кучлари Украинага Европадан етказилган С-300 зенит-ракета комплексларининг учириш мосламаларини йўқ қилди. РФ Мудофаа вазирлиги матбуот котиби Игорь Конашенков шундай ахборот тарқатди.

“10 апрель куни Днепропетровск шаҳрининг жанубий чеккасида “Калибр” юқори аниқликдаги денгиз ракеталари Европа давлатларидан бирининг Киевга етказиб берилган С-300 зенит-ракета дивизиясининг ангарда яширинган жиҳозларини йўқ қилди. Жумладан, тўртта С-300 ракетаси ва Украина қуролли кучларининг 25 нафаргача ходими ҳам йўқ қилинди”, деган генерал-майор.

Бундан ташқари, Успеновка ҳудудида С-300 ҳаво мудофаа тизимини ёритиш ва бошқариш учун радар яроқсиз ҳолга келтирилган.

Ўтган жума куни Словакия Бош вазири Эдуард Хегер Братислава С-300 ҳаво мудофаа тизимини Киевга топширганини эълон қилганди. Республика Мудофаа вазири Ярослав Нагининг аниқлик киритишича, яқин келажакда мамлакат АҚШдан Patriot тизимининг тўртинчи мажмуасини олади.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.