Россия Украинадаги уруш бошқарувини тажрибали қўмондонга топширди

Россия Украинадаги “операциялар”ни юритувчи қўмондонлигини қайта ташкил қилди. Эндиликда ҳарбий ҳаракатлар Жанубий ҳарбий округ қўмондони, Суриядаги жанговар ҳаракатларда катта тажриба орттирган генерал Александр Дворников томонидан назорат қилинади.Бу ҳақда BBC хабар берган.

Нашр манбасига кўра, жорий йилнинг 24 февраль куни Украинага бостириб кирган ҳарбий қисмлар ўртасида мувофиқлаштириш жуда ёмон бўлган. 

“Бу қўмондон Россиянинг Суриядаги операцияларида катта тажрибага эга. Шунинг учун биз умумий қўмондонлик ва назорат яхшиланишини кутамиз”, деган манба.

Шунингдек, у музокаралар ҳарбий амалиётлардан устун бўлиши мумкинлигини таъкидлаган. Шундай бўлган тақдирда Кремль Россия Иккинчи жаҳон урушидаги ғалабани нишонлаётган 9 май арафасида қандайдир ютуқлар ҳақида хабар бериши мумкин. 

Манбанинг сўзларига кўра, агар Россия ҳозиргача қўшинларнинг жанг майдонида сезиларли муваффақиятларга эришишига тўсқинлик қилган ҳарбий тактикани ўзгартирмаса, у ҳолда украина қўшинлари ўзларининг сон бўйича устунлиги билан ҳам Россияга қарши самарали қаршилик кўрсата олади. 

Эслатиб ўтамиз, АҚШ разведкаси Путин 9 майда Украина урушидаги ғалабасини эълон қилмоқчилиги ҳақида маълумот тарқатганди. 

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.