Россия Одессага олтита ракета учирди

Кеча, 7 май куни Россия ҳарбийлари Одесса вилоятига олтита ракета учирди. Бу ҳақда “Суспiльне Новини” нашри  Жанубий мудофаа кучлари матбуот маркази раҳбари Наталя Гуменюкка таяниб, хабар берди. 

Қайд этилишича, тўртта снаряд Одессадаги турар-жой ҳудудидаги фуқаролик корхонасига тегиб, ёнғинга сабаб бўлган. 

Яна иккита ракета аэропортнинг аввал вайрон қилинган учиш-қўниш йўлагига келиб тушган. 

Ўз навбатида, Россия Мудофаа вазирлиги Арциз, Одесса ва Вознесенск ҳудудларидаги ҳарбий аэродромларга юқори аниқликдаги қуроллардан зарбалар берилганини, оқибатда Украина Ҳарбий-ҳаво кучларининг авиация техникаси ва қурол-яроғлари йўқ қилинганини маълум қилган. 

Эслатиб ўтамиз, Россия бундан аввал икки марта Одессага зарба берганди. 

Биринчи маротаба Россия православ Пасха байрами арафасида Одессага, жумладан, турар-жой биносига ракета зарбалари берганди. Ҳужумда саккиз киши, жумладан, уч ойлик чақалоқ ҳалок бўлган.

Кейин эса, Россия Одессанинг “инфратузилма объектларидан бири”га ракета ҳужуми уюштирганди. Оқибатда 15 ёшли бола ҳалок бўлгани, 17 ёшли қиз эса жароҳатлангани айтилганди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.