Путин урушдан олдин берган топшириғини бажармаганларни жазолашни буюрди

Россия Президенти Владимир Путин Украинадаги урушга муддатли ҳарбий хизматчиларни юборганларни аниқлаб, жазолаш бўйича кўрсатма берди.

Президент Матбуот котиби Дмитрий Песковнинг маълум қилишича, Владимир Путин муддатли ҳарбий хизматчиларни Украинадаги операцияда қатнашишини қатъиян истисно қилиш тўғрисида берган топшириғининг бажарилиши тўғрисида ҳисобот олган.

Унинг таъкидлашича, ушбу кўрсатмани бажармаганлик учун айбдор мансабдор шахсларнинг хатти-ҳаракатларига ҳуқуқий баҳо бериш ва жазолаш учун материаллар Бош ҳарбий прокуратурага юборилган.

“Махсус ҳарбий операция бошланишидан олдин Россия Президенти, Олий Бош қўмондон Владимир Путиннинг топшириғига биноан, барча қуролли кучлар бўлинмалари қўмондонларига қуйидагилар топширилди: Украина ҳудудида ҳар қандай вазифани бажариш учун муддатли ҳарбий хизматчиларни жалб қилишни қатъиян истисно қилиш. Президент Путинга ушбу кўрсатманинг бажарилиши ҳақида маълумот берилди”, деган Песков журналистларга.

Қайд этилишича, Украина ҳудудидаги махсус ҳарбий операцияда иштирок этаётган қуролли кучлар бўлинмаларида бир қатор муддатли ҳарбий хизматчилар борлиги фактлари юзасидан Россия Президентининг кўрсатмаси бўйича Бош ҳарбий қисмга материаллар юборилган. Прокуратура ушбу кўрсатмаларни бажармаганликда айбдор мансабдор шахсларнинг хатти-ҳаракатларини текшириб, уларга ҳуқуқий баҳо бериши айтилган. 

Аввалроқ, Путин Украинадаги урушда Россия армияси сафида муддатли ҳарбий хизматчилар қатнашмаётгани ва қатнашмаслигини, шунингдек, захирадаги ҳарбий хизматчилар уруш учун қўшимча сафарбар қилинмаслигини айтганди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.