Путин Украинадаги урушга кимларни юборганини айтди

Украинадаги урушда Россия армияси сафида муддатли ҳарбий хизматчилар қатнашмаяпти ва қатнашмайди, шунингдек, захирадаги ҳарбий хизматчилар уруш учун қўшимча сафарбар қилинмайди. Бу ҳақда Россия Президенти Владимир Путин маълум қилди.

Президент Путин 8 март куни муносабати билан йўллаган табригида ҳозирда урушда қатнашаётган ҳарбий хизматчиларнинг яқинларига мурожаат қилган.

“Ҳозир жангларда, урушда Россияни ҳимоя қилаётган аскар ва офицерларимизнинг оналари, рафиқалари, опа-сингиллари, келинлари ва дугоналарига мурожаат қилмоқчиман. Мен сизнинг севганларингиз ва яқинларингиз ҳақида қайғураётганингизни тушунаман. Сиз улар билан фахрлансангиз арзийди, негаки бутун мамлакат улар учун сиз билан қайғуряпти ва фахрланяпти. Шуни алоҳида таъкидлашим керакки, ҳарбий хизматни ўтаётган аскарлар ҳарбий ҳаракатларда қатнашмаяпти ва қатнашмайди. Ва резервдагиларни қўшимча чақириш бўлмайди”, деган Путин.

РФ Президентининг сўзларига кўра, Украинада фақат профессионал жангчилар курашяпти.

“Улар Россия халқи учун хавфсизлик ва тинчликни ишончли таъминлашига шубҳам йўқ”, деган РФ раҳбари.

Шунингдек, у Қуролли Кучларга хизмат қилаётган аёлларга алоҳида миннатдорлик билдирган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.