Путин фашизмга қарши курашда ҳалок бўлганлар хотирасини шарманда қилмоқда - Трюдо

Олам 8328
image
-

Россия Президенти Владимир Путин фашизмга қарши курашда жонини фидо қилган инсонлар хотирасини таҳқирламоқда. Бу ҳақда Канада Бош вазири Жастин Трюдо Украина президенти Владимир Зеленский билан қўшма матбуот анжуманида айтиб ўтган.

“Ҳозир биз Европада Ғалаба кунини нишонлаяпмиз. Ўнлаб йиллар олдин иттифоқчи мамлакатлардан, Украинадан, Россиядан келган аскарлар елкама-елка туриб, фашизмни енгиб чиққанлар. Владимир Путиннинг бугун, сўнгги ҳафталарда қилаётган ишлари озодлик йўлида жонини фидо қилган миллионлаб русларнинг муборак хотирасига иснод бўлади”, дейди Трюдо.

У Канада Украинани қўллаб-қувватлашда давом этишига ишонтирди.

“Биз Владимир Путинга қарши Украина билан бирдамликда ҳаракат қилишда давом этишимизга шубҳа қилмаймиз”, дейди Канада Бош вазири.

Эслатиб ўтамиз, Жастин Трюдо кеча, 8 май куни кутилмаган ташриф билан Украинага борди. У Киев вилоятининг Ирпень шаҳрида бўлиб, бу ердаги ваҳшийликлар билан танишганди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Суннатилла Абдуллаев
Мақолага баҳо беринг
Баҳолаганлар: 21
Рейтинг: 3.1
t
×