Лукашенко Ғарбнинг мақсади икки давлатни йўқ қилиш эканини айтди 

Украинадаги воқеалар Ғарбнинг мақсади Россия ва Хитой каби рақобатчиларни йўқ қилиш эканлигини исботлади. Бу ҳақда Беларусь фуқароси Александр Лукашенко таъкидлади.  

“Сиёсий курсни ўзгартириш — бу минтақадаги таъсир доираларини қайта тақсимлашга уриниш. Шубҳасиз, якуний мақсад — Россия, Хитой ва уларни дунёнинг геосиёсий харитасида рақобатчи сифатида йўқ қилиш. Украина атрофида содир бўлаётган воқеалар бунинг тўғридан-тўғри далилидир”, деган Лукашенко давлат хавфсизлик идоралари раҳбарияти билан учрашувда. 

Лукашенконинг таъкидлашича, Беларуснинг “айби” фақат Европанинг марказида манфаатлар чорраҳасида жойлашганлигидир. 

“Худо бизни олиб, бу ерга, Европанинг марказига жойлаштирди. Атрофга йўл йўқ, айланиб ўтиш ҳам йўқ. Афтидан, мамлакат катта эмас, лекин ҳамма у орқали ўтган. Қоқилиб кетган, йиқилган, ўрнидан турган, эмаклаган, лекин юрган”, деган Лукашенко 1812 йил воқеалари, Биринчи жаҳон уруши ҳақида эслаб. 

Унинг сўзларига кўра, ҳар доим шундай бўлади, чунки “манфаатлар Беларусь орқали кесишади”. 

“Биз эса шундай сиёсат қуришимиз керакки, ҳар қанча қийин бўлмасин, юртимизни сақлаб қолишимиз керак”, деган Лукашенко.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.