Лукашенко ўзбекистонликларни Беларусга ишга жалб этиш тартибини тушунтирди

Беларусь Президенти Александр Лукашенко мамлакатга меҳнат мигрантларини жалб этиш тартиби ва уларга қўйиладиган талабларни очиқлади. Бу ҳақда БелТА хабар берди.

Лукашенко ушбу масала яқинда Беларусга ташриф буюрган Ўзбекистон Президенти Шавкат Мирзиёев билан ҳам муҳокама қилинганини эслатган.

“Бу, айниқса, айрим ҳудудларимиз учун муҳим. У ерда кадрларга бўлган эҳтиёжни қоплаш керак. Чет давлатлардан ишчи кучини таклиф қилиш бўйича тизим ишлаб чиқиш ҳақида қарор қабул қилинди. Украиналиклар кетди, кўплаб россияликлар бизга ишлаш учун келмоқда. Шавкат Мирзиёев билан ҳам музокаралар ўтказдик. Ўзбекистонда одамларни иш билан таъминлаш муаммоси бор. Мен унга таклиф бердим. Бизда тизим мавжуд: аввало элчихона дастлабки босқичда кимни қабул қилиш мумкин, кимни мумкин эмаслигини аниқлайди. Шундан сўнг, корхона раҳбари ўзига қайси мутахассисликлар бўйича қанча одам кераклигини белгилайди ҳамда ўзи танлайди”, деган у.

Беларусь Президенти яқин вақт ичида 200 нафарга яқин ўзбекистонлик Витебск вилоятида ишлаш учун келишга тайёрлигини айтган.

“Ҳозирча улар Витебск вилоятига келади. Чунки у ерда одам жуда кам. Могилёв вилоятининг жануби-шарқида ҳам қанча ва қандай мутахассислар кераклигини кўриб чиқиш лозим. Уларни битта жойга тўпламаслик керак. Улар ҳудудлар бўйлаб тақсимланади. Бизга ҳамма жойда одам керак”, деган Лукашенко.

Унинг сўзларига кўра, Беларусь зарурат туғилганда келаётган ишчиларни мамлакатнинг ўзида қўшимча кадрларни тайёрлаш ва ўқитишга ҳам тайёр.

“Албатта, тайёр мутахассислар бўлса, бундан хурсанд бўламиз. Аммо имкон қадар оилалари билан келганлари маъқул. Оилали инсон келадиган бўлса, бу биз учун яхши”, деган Беларусь раҳбари.

Шу билан бирга, у меҳнат мигрантларини жалб қилиш жараёни Ички ишлар вазирлиги тизими орқали қатъий назорат қилиниши таъкидлаган.

“Тизим бўлиши керак. Бизда у мавжуд ва уни мен белгилаганман. Ишчини корхона раҳбари ишга олади ва унинг учун жавобгар бўлади. Тартиб бўлиши керак. Ҳеч нарса тартибсиз амалга оширилмаслиги лозим”, деган у.

Лукашенко мигрантлар эҳтиёжга қараб танлаб олиниб, жалб қилинишини қайд этган.

“Танлаб, аниқ мақсад билан. Бир, икки, ўн ёки йигирма киши. Кимга қанча керак бўлса, шунча. Ҳар бири учун шахсий жавобгарлик бўлади”, дея қўшимча қилган у.

Беларусь Президенти Ўзбекистон билан ҳамкорлик фақат меҳнат мигрантларини жалб қилиш билан чекланмаслигини ҳам таъкидлаган.

“Келиб ерга ишлов беринглар, солиқларни тўланглар ва биз бу маҳсулотни Ўзбекистонга сотамиз. Бу 40 миллион аҳолига эга барқарор ва тез ўсиб бораётган бозор. Шу билан бирга, у ердан ишчи кучини ҳам қабул қилишга тайёрмиз. Витебск вилоятига инвестор излаяпмиз”, деган у.

Беларусь Президенти Администрацияси раҳбари Дмитрий Крутойнинг айтишича, Ўзбекистон Президенти Шавкат Мирзиёев ҳам бу масалани шахсан назорат қилади.

“Мирзиёев сиз билан учрашувдан кейин бу масалани назорат қилиш бўйича топшириқ берди. Беларусга фақат мутахассислар юборилади”, деган Крутой.

Унинг маълум қилишича, айни пайтда Беларусда 7 минг нафар Ўзбекистон фуқароси рўйхатдан ўтган. Уларнинг бир қисми иқтисодиёт тармоқларида ишлаётган бўлса, кўпчилиги олий таълим муассасаларида таҳсил олмоқда. Келгусида уларнинг айримлари Беларусда ишлашни давом эттириши мумкин.

Лукашенко Беларусда меҳнат мигрантларини жалб қилиш бўйича ижобий тажриба мавжудлигини айтиб, улар учун муносиб яшаш шароитларини яратиш, уй-жой билан таъминлаш ва Беларусь фуқаролари билан тенг ҳуқуқлар бериш зарурлигини таъкидлаган.

“Фақат келинглар ва ишланглар”, деган у.

Сўзини якунлар экан, Беларусь Президенти меҳнат мигрантларини жалб қилиш масаласидан қўрқмаслик кераклигини, бироқ мухолифлар бу мавзуни доим сиёсий баҳсга айлантиришга уринаётганини таъкидлаган.