Кремль Украинани тинч қўйиш учун қайси версияни кўриб чиқаётгани маълум бўлди

Олам

image

Украинадаги қуролсизлантирилган давлатнинг Австрия ёки Швеция версияси ҳозир муҳокама қилинмоқда, буни муроса сифатида кўриш мумкин. Бу ҳақда бугун, 16 март куни Россия Федерацияси Президентининг матбуот котиби Дмитрий Песков маълум қилди.

Бундан олдин Россия Президенти ёрдамчиси Владимир Мединский Киев Украинада қуролсизлантирилган давлатнинг Австрия ёки Шведция версиясини қуриш таклиф қилаётганини маълум қилганди. Шу муносабат билан журналистлар демилитаризациянинг бу варианти Кремлни қаноатлантиряптими, деган савол берган.

“Бу ҳозир муҳокама қилинаётган ва маълум бир муросага эришиш мумкин бўлган вариант”, деб жавоб берган Песков.

Песков Украина билан муросага келиш учун шведча версия кўрилаётгани ҳақида фикр билдирмаган.

“Тафсилотларга кирмасликни маъқул кўраман. Яна бир бор таъкидламоқчиманки, давом этаётган музокаралар контекстида бу мавзу бўйича бошқа тафсилотларни айтиб бўлмайди”, дея тушунтирган у.

Кремль вакилига кўра, Украина атрофидаги вазиятни Москва ва Киев ўртасидаги музокаралардаги келишувлар ёрдамида яхшилаш мумкин. 

“Украина атрофидаги вазиятни Россия ва Украина делегациялари ўртасидаги музокараларда келишувга эришиш орқали яхшилаш мумкин”, деган Песков.

Аввалроқ Давлат департаменти, агар Украина атрофидаги вазиятдаги кескинликни пасайтириш учун фойдали бўлса, АҚШ Россия билан музокаралар олиб боришга тайёрлигини билдирган эди.

Президент матбуот котиби, шунингдек, Украинадаги урушда рус қўшинларига айнан ким раҳбарлик қилаётгани ҳақидаги саволни Мудофаа вазирлигига йўллаган.

“Бу Мудофаа вазирлигининг иши”, деган Кремль матбуот котиби журналистларга.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

36

Рейтинг

3

Мақолага баҳо беринг

Дўстларингиз билан улашинг