Истанбул музокаралари доирасида мингдан ортиқ украиналик ортга қайтарилди

Истанбул тинчлик музокаралари доирасида Украина Россиядан 1000 дан ортиқ маҳбусни қайтариб олди.  Бу ҳақда Украина Президенти Владимир Зеленский бугун, 24 июлга ўтар кечаси ўзининг Telegram-каналида маълум қилди.

“Бугун Истанбулда келишилган алмашинувнинг тўққизинчи босқичи бўлиб ўтди. Оғир касал ва оғир яраланган ҳимоячилар уйларига қайтишмоқда. Энди биз тафсилотларни баҳам кўришимиз мумкин: яқинда Истанбул келишувларининг барча босқичларида мингдан ортиқ ватандошларимизни қайтаришга муваффақ бўлдик”, дейди у.

Президентнинг сўзларига кўра, минг оила учун бу ўз яқинларини яна бағрига олиш қувончини англатади.

“Мен бу ишга ҳисса қўшган барчага миннатдорлик билдираман. Бугун қайтиб келган жангчилар турли фронтларда Украинани ҳимоя қилишди. Уларнинг кўплари асирликда уч йилдан ортиқ вақт ўтказдилар. Ҳар бирига зарур кўмак ва тиббий ёрдам кўрсатилади. Муҳими, алмашинувлар давом этиши, халқимиз ватанига қайтиши”, дея давом этди Президент.

Зеленский ушбу муҳим вазифа устида ишлашда давом этган барчага миннатдорчилик билдирди.

“Бутун халқимизнинг қайтиши давлатимиз учун устувор вазифадир. Биз эса ҳар бир юртдошимизнинг асирликдан қайтишини таъминлаш учун барча имкониятларимизни ишга соламиз”, дея хулоса қилди Украина Президенти.

Маълумки, 2 июнь куни Истанбулда Россия ва Украина вакиллари ўртасида тўғридан тўғри музокараларнинг иккинчи раунди бўлиб ўтганди. Томонлар оғир яраланган аскарлар ва 25 ёшгача бўлган асирларни алмашиш, шунингдек, урушда ҳалок бўлган 6000 нафар ҳарбий хизматчиларнинг жасадини бир-бирига топширишга келишиб олди.

Шундан сўнг, бир қатор ҳарбий асирлар алмашинуви бўлиб ўтди – хусусан, 9, 10, 12, 19, 20, 26 июнь ва 4 июль кунлари. Шу билан бирга, ўликларнинг жасадларини алмаштириш давом этмоқда.