Россия ва Украина навбатдаги асирлар алмашинувини амалга оширди

Бугун, 12 июнь куни Россия ва Украина Истанбулдаги музокаралар чоғида келишилган ҳарбий асирларни алмашишнинг навбатдаги раундини ўтказди. Бу ҳақда Украина Президенти Владимир Зеленский ва Россия Мудофаа вазирлиги маълум қилди.

“Бугун армиямиз жангчилари, миллий гвардиячилар ва чегарачилар уйда. Улар даволанишга муҳтож ва, албатта, зарур ёрдам кўрсатилади. Бу оғир яраланган ва оғир касалланган жангчиларни қайтариш бўйича иккинчи босқич”, деб ёзди Зеленский.

Россия томони эса, аввалги алмашинувлардан сўнг билдирилганидек, Россия Қуролли Кучлари хизматчилари Беларусга олиб келингани, у ерда уларга психологик ва тиббий ёрдам кўрсатилаётганини, кейинроқ эса Россия Мудофаа вазирлигининг тиббиёт муассасаларига даволаш ва реабилитация учун жўнатилишини маълум қилди.

9 июнь куни ҳам Россия ва Украина томонлари ёши 25 ёшдан кичик бўлган ҳарбий асирларни алмашди. Киев маълумотларига кўра, уйга яраланган ва оғир яраланган ҳарбий хизматчилар ҳам қайтарилган. Ўшанда Украинадаги Асирлар билан ишлаш бўйича мувофиқлаштирувчи штаб, хавфсизлик нуқтаи назаридан, озод қилинганлар сони бутун жараён тугагандан сўнг аниқланишини билдирган эди.

Кейинги куни томонлар оғир яраланган ва яраланган ҳарбийларни алмашишди.

2 июнь куни Истанбулда бўлиб ўтган Россия ва Украина делегациялари ўртасидаги музокараларда кенг кўламли асирлар алмашинуви бўйича келишувга эришилган. Томонлар оғир яраланган ҳарбийлар ва ёши 18 ёшдан 25 ёшгача бўлган асирларни алмашиш ҳамда ўзаро урушда ҳалок бўлган 6000 нафар ҳарбий хизматчининг жасадларини қайтариш ҳақида келишган.