Эрдўған ва Жапаров ўзаро совғалар алмашди (видео)

Бишкекка давлат ташрифи чоғида Туркия Президенти Ражаб Тойиб Эрдўған ва Қирғизистон Президенти Садир Жапаров ўзаро рамзий совғалар алмашди. Бу икки давлат ўртасидаги ҳамкорликнинг кучайиши фонида эътиборга молик иш бўлди. Бу ҳақда Туркия Президенти девонхонаси хабар берди.

Қирғизистон Президенти туркиялик мавқедошига от совға қилди. Бунга жавобан Эрдўған Жапаровга TOGG маркали замонавий турк электромобилини совға қилди.

Шунингдек, давлат раҳбарлари Стратегик ҳамкорлик бўйича Олий кенгашнинг олтинчи йиғилишида иштирок этиб, ўзаро ҳамкорликнинг асосий йўналишларини муҳокама қилдилар.

Туркия Президенти мазкур ташрифи доирасида 6 ноябрь куни Бишкекда бўлиб ўтадиган Туркий давлатлар ташкилоти саммитида иштирок этиши кутилмоқда. Ушбу тадбир аъзо мамлакатлар ўртасида минтақавий ҳамкорлик ва ҳамдўстликни мустаҳкамлашда муҳим қадам бўлади.

Эслатиб ўтамиз, ўтган йили 17-18 июль кунлари Саудия Арабистони ва Қатарга борган Ражаб Тойиб Эрдўған валиаҳд шаҳзода Муҳаммад бин Салмон ва Қатар Амири Шайх Тамим бин Ҳамад Ол Сонийга ҳам Togg электромобилини совға қилган эди. Кейин у БААда меҳмон бўлиб, БАА Президенти Шайх Муҳаммад бин Зоид Ол Наҳаёнга ҳам ушбу автомобилни олиб борди. Бундан аввал ушбу электромобиль Ўзбекистон ва Озарбайжон Президентлари Шавкат Мирзиёев ва Илҳом Алиевга совға қилинганди.