Россия Украина билан тинчликка эришишга рози, аммо... – Песков

Россия Президенти Владимир Путин Украинада ўт очишни тўхтатиш ғоясини ҳамон қўллаб-қувватламоқда, бироқ бу содир бўлгунча баъзи саволларга жавоб берилиши керак. Бу ҳақда Россия Президенти матбуот котиби Дмитрий Песков журналистлар билан ўтган учрашувда сўз очди.

Унинг сўзларига кўра, Москва бошқа давлатлар Украина армиясини қайта қуроллантириш хавфидан хавотирда. Можарони ҳал қилишда Россия биринчи навбатда ўз манфаатларини ҳисобга олиши керак.

Шунингдек, Песков ҳамма нарсага ойдинлик киритилгандан кейин Украина билан тинчлик шартномаси имзоланиши мумкинлигини айтган.

Эслатиб ўтамиз, март ойида Қўшма Штатлар Украинада 30 кунлик ўт очишни тўхтатишни, сўнгра жангларни бутунлай тўхтатиш бўйича келишувни таклиф қилган эди. Киев бу таклифни қабул қилди. Владимир Путин эътиборга олиниши керак бўлган нуансларга, жумладан, сулҳ шартларига риоя этилишини ким назорат қилишига эътибор қаратди. АҚШ, Россия ва Украина ўртасидаги алоҳида маслаҳатлашувлардан сўнг, томонлар энергетика объектларига, кейинроқ эса Қора денгизга ҳужумларни тўхтатишга келишиб олишди.