Украина тинчликка тайёр – Зеленский

Украина Президенти Владимир Зеленский АҚШнинг 30 кунлик оташкесим ҳақидаги таклифи ижобий эканини айтди. Бу ҳақда у кеча, 11 март куни ўзининг кечки видеомурожаатида сўз очди.

“АҚШ Россияни ишонтириши керак. Шунинг учун биз тайёрмиз, агар руслар рози бўлса, сулҳ кучга киради”, деди Зеленский АҚШ ва Украина делегацияларининг Саудия Арабистонидаги учрашуви ҳақида гапирар экан.

Учрашувни ижобий деб баҳолар экан, Зеленский учрашув давомида томонлар кўплаб муҳим тафсилотларни муҳокама қилганини таъкидлади. Унга кўра, Қўшма Штатлар Россия-Украина урушида 30 кунлик сулҳ тузишни таклиф қилган.

“Украина бу таклифни қабул қилади, биз буни ижобий деб ҳисоблаймиз. Биз шундай қадам ташлашга тайёрмиз ва АҚШ Россияни ишонтириши керак”, дея қўшимча қилди у.

Зеленский агар сулҳга эришилса, 30 кун ичида АҚШ ва бошқа иттифоқчилар билан учрашувлар ўтказилиши, Украина учун хавфсизлик ва барқарор тинчликни кафолатлаш учун ҳаракат қилинишини таъкидлаган.

north_east

Трамп Зеленскийни яна Оқ уйга таклиф қилади (видео)

“Украина тинчликка тайёр. Россия ҳам урушни тугатиш ёки давом эттиришга тайёрлигини кўрсатиши керак”, дея хулоса қилди Президент.

Эслатиб ўтамиз,  кеча, 11 март куни Жидда шаҳрида АҚШ ва Украина делегациялари музокара ўтказганди. Музокаралардан сўнг Украина Президенти девонининг раҳбари Андрей Ермак агар Россия худди шундай қадамга рози бўлса, Украина АҚШнинг 30 кунга ўт очишни тўхтатиш ҳақидаги таклифини қабул қилишга тайёрлигини билдирди. АҚШ Давлат котиби Марко Рубио ҳам Украинанинг ўт очишни тўхтатиш таклифини Россия томонига етказишларини ва “тўп энди Россия майдонида” эканини айтди.