Келлогг Украинани Ғарб ва Россия ўртасида бўлиб олишни таклиф қилди

Украина урушдан кейинги Берлин мисолида Европа давлатлари ва Россия ўртасида назорат зоналарига бўлиниши мумкин. Бундай фикрни АҚШ Президентининг Украина бўйича махсус вакили Кит Келлогг Британиянинг “The Times” газетасига берган интервьюсида билдирди.

“Иккинчи жаҳон урушидан кейин Берлин билан содир бўлган воқеага ўхшаш нарсани қилишингиз мумкин, у ерда Россия зонаси, Франция зонаси, Британия зонаси ва Америка зонаси мавжуд эди”, деди у.

Келлоггнинг айтишича, Британия ва Франция қўшинлари янги жангларнинг олдини олиш учун тўхтатувчи куч сифатида ғарбий Украинани эгаллаб олиши мумкин, Россия армияси эса Украина шарқини назорат қилади. АҚШ Президенти Дональд Трампнинг махсус вакилига кўра, Украина кучлари Европа ва Россия қўшинлари ўртасида жойлашиши мумкин.

Келлогг, шунингдек, ҳозирги фронт чизиғи бўйлаб 30 километрлик қуролсизлантирилган ҳудуд яратиш мумкинлигини ҳам таклиф қилди.

“Америка қўшинлари Украинада жойлаштирилмайди”, дея таъкидлади у.

Келлогг Днепр дарёсининг ғарбий қирғоғига Британия-Франция бошчилигидаги ҳарбий контингентнинг жойлаштирилиши Россияга нисбатан провокацион қадам бўлмаслигини айтди.

Унинг қўшимча қилишича, Украина етарлича катта давлат бўлиб, ўт очишни тўхтатишни таъминлаш учун унинг ҳудудига бир нечта армия жойлаштирилиши мумкин.

Нашрнинг қайд этишича, америкалик юқори мартабали амалдор биринчи марта ўт очишни тўхтатишга эришилгандан кейин мумкин бўлган чегара чизиғи сифатида Днепрни тилга олган. Газетанинг ёзишича, Келлоггнинг режасида Украина Россия назорати остидаги ҳудудлардан воз кечиши керак бўлади.

Маълумот учун, 12 март куни Россия Ташқи ишлар вазири Сергей Лавров НАТО қўшинларининг Украина тупроғида исталган байроқ остида ва ҳар қандай мақомда бўлиши Россия учун таҳдид эканини айтган. Унинг сўзларига кўра, Россия буни ҳеч қандай шароитда қабул қилмайди.