Japarov  Putin uchun norasmiy dasturxon yozdi

Rossiya Federatsiyasi Prezidenti Vladimir Putin va Qirg‘iziston rahbari Sadir Japarov norasmiy tushlik qildi. Ziyofat “Ala-Archa” davlat qarorgohida bo‘lib o‘tdi.

Ma’lum qilinishicha, rahbarlar tig‘iz ish dasturiga ega bo‘lgan. Putin 12 oktyabr kuni erta tongda Bishkekka tashrif buyurdi. So‘ngra Japarov mehmonni rasmiy kutib olish marosimida qatnashdi. Shundan so‘ng, davlat rahbarlari delegatsiyalar ishtirokida muzokaralar o‘tkazdi, ikki tomonlama hujjatlar imzolandi. Putin va Japarov ham OAV uchun bayonot berishdi.

OAV bilan uchrashuvdan so‘ng, ular birgalikda Rossiyaning Qirg‘izistondagi Kant aviabazasining 20 yilligiga bag‘ishlangan tantanali marosimda ishtirok etishdi.

Aytib o‘tish lozimki, Putin va Japarovning Bishkekdagi uchrashuvi juda quyuq kechdi. Avvaliga, Rossiya yetakchisi qirg‘izistonlik mavqedoshi Sadir Japarov bilan o‘tgan muzokaralar chog‘ida uni “Shon-sharaf” ordeni bilan taqdirladi va Qirg‘izistonni Rossiyaning asosiy hamkori deb atadi.

Keyin esa Rossiya davlati rahbari uni mukofot bilan tabriklar ekan, “Biz sizni Yevroosiyo makonida integratsiya jarayonlarini izchil rivojlantirish, umumiy mintaqamizda sheriklik, hamkorlik muhitini mustahkamlashning ishonchli tarafdori sifatida ham bilamiz”, dedi Putin.

Eslatib o‘tamiz, Qirg‘izistonning Bishkek shahrida MDH davlat rahbarlari kengashining navbatdagi majlisi bo‘lib o‘tmoqda. Biroz avval O‘zbekiston Respublikasi Prezidenti Shavkat Mirziyoyev ushbu majlisda qatnashish uchun Bishkek shahriga yetib keldi.