O‘zbekistonliklar, jangchingizni “sindirib” tashlayman – Ro‘ziboyevning raqibi 

Joriy yilning 4 noyabr kuni Nursulton Ro‘ziboyevga qarshi jang qilishi kutilayotgan braziliyalik UFC jangchisi Kayo Borralo Twitter sahifasi orqali o‘zbekistonlik muxlislar va bo‘lajak raqibiga murojaat qildi. 

“O‘zbekistonlik muxlislar, o‘zingizni bosing. Men hali ham sizlarni juda hurmat qilaman, ammo o‘sha kuni jangchingizni “sindirib” tashlayman”, dedi u.

Shuningdek, Borralo navbatdagi postida 22 iyul kuni UFC'ning Londonda tashkil etilgan musobaqasida Brayan Barberenaga kurashda hech qanday imkon qoldirmagan va mag‘lubiyatga uchratgan Mahmud Murodovni ham ustidan kulgan.

“Men Murodovni yaxshigina kurashchiga aylantirib qo‘yibmanku”, degan Borralo.

Gap shundaki, 2022 yilning 22 oktyabr kuni Abu-Dabida bo‘lib o‘tgan UFC 280 turnirida Mahmud Murodov aynan Kayo Borraloga qarshi jang o‘tkazib, to‘liq davom etgan bahsda hakamlarning qarori bilan mag‘lubiyatga uchragan edi. Mazkur jangda Borralo O‘zbekiston vakilini kurashdagi ustunligi orqali qiynab qo‘ygan.

Shundan so‘ng, ijtimoiy tarmoqlarda Mahmud Murodovning kurashdagi muammolari muxlislari tomonidan keng muhokama qilingan. 

U Barberena ustidan qozonilgan g‘alabani quyidagicha izohladi.

“Ayrim muxlislar mening kurashim yo‘q ekanini aytgandi. Bu jangda men kurashimni ko‘rsatdim. Bu safar “stoyka”da jang qilmasdan ham g‘alaba qozondim”, deydi Murodov.

Ma’lumot uchun, Ro‘ziboyev bunga qadar 43 marta oktagonga ko‘tarilib, 35 ta jangida g‘alaba qozongan, 8 ta bahsda esa raqiblariga imkoniyatni boy bergan. Uning UFC'dagi natijasi 1-0 va Ro‘ziboyev ham promoushendagi ilk jangida braziliyalik MMA'chi Bruno Ferreyra bilan jang qilib, uni nokautga uchratgan edi. Kayo Borralo esa faoliyati davomida 15 ta jangda qatnashib, 14 marta g‘alabaga erishgan va 1 marta imkoniyatni boy bergan. Borralo UFC'da 4 ta jang o‘tkazgan va barchasida g‘alaba qozongan.

Eslatib o‘tamiz, avvalroq Mahmud Murodov UFC'da rekord natija qayd etgani haqida xabar berilgan edi. U Brayan Barberenaga qarshi kechgan jangda 16 marta teykdaun (raqibini kurash usuli bilan yerga yotqizishga urinish) ga intilgan va shundan 13 tasi muvaffaqiyatli amalga oshirilgan.