O‘zbekistondagi o‘quvchilar dunyo reytingida matematika va tabiiy fanlarni bilish bo‘yicha past o‘rinlarni egalladi

Ta’limdagi yutuqlarni baholash xalqaro assotsiatsiyasi (IEA) tomonidan TIMSS 2023  baholash dasturi doirasida o‘zbekistonlik o‘quvchilarning matematika va tabiiy fanlarni bilish natijasi e’lon qilindi. Bu haqda Maktabgacha va maktab ta’limi vazirligi ma’lum qildi.

Qayd etilishicha, 2023 yil aprel-may oylarida O‘zbekistonda o‘tkazilgan ushbu tadqiqotda barcha hududlardan tanlab olingan 166 ta maktabdan jami 8800 nafar o‘quvchi (shundan, 4450 nafar 4-sinf va 4350 nafar 8-sinf) ishtirok etgan.

Shuningdek, mazkur maktablarning 166 nafar direktorlari hamda 1035 nafar matematika va tabiiy fanlar bo‘yicha o‘qituvchilari ham so‘rovnomada qatnashgan.
Xalqaro hisobot natijalariga ko‘ra, O‘zbekistondagi 8-sinf o‘quvchilarining matematik savodxonlik bo‘yicha o‘rtacha ko‘rsatkichi 421 ball bo‘lib, qatnashuvchi 44 ta davlatdan 32-o‘rinni egallagan. 8-sinf tabiiy fanlar (Science) savodxonligi bo‘yicha esa qatnashgan 44 ta davlat orasidan 396 ball bilan 39-o‘rinni qayd etgan.

Tadqiqotda qatnashgan o‘zbekistonlik 4-sinf o‘quvchilari tabiiy fanlar (Science) savodxonligi bo‘yicha 412 ball to‘plagan va ishtirokchi 58 ta davlat ichida 54-o‘rinni qo‘lga kiritgan. Matematika savodxonligi bo‘yicha esa qatnashuvchi 58 ta davlat ichida 443 ball bilan 50-o‘rinni egallagan.

O‘zbekistonda 4-sinflardagi qizlar (446 ball) matematika yo‘nalishida o‘g‘il bolalardan (440 ball) yaxshiroq natija qayd etgan bo‘lsa, tabiiy fanlar yo‘nalishida ham xuddi shunday farq saqlanib qolgan (qizlar 414 ball, o‘g‘il bolalar 409 ball).

Tabiiy fanlar yo‘nalishida 8-sinflardagi qizlar (395 ball) va o‘g‘il bolalar (396 ball) deyarli bir xil natija qayd etgan bo‘lsa, matematika yo‘nalishida o‘g‘il bolalar (426 ball) qizlardan (416 ball) ko‘ra yuqoriroq natija egallagan.

Eslatib o‘tamiz, avvalroq 2024 yilgi EF English Proficiency indeksiga ko‘ra, O‘zbekiston aholisi ingliz tilini bilish darajasi past mamlakatlar qatoridan joy egallagani xabar qilingandi. Unga ko‘ra, O‘zbekiston 114 ta mamlakat orasida 98-o‘rinni egallagan.