Ўзбекистондаги ўқувчилар дунё рейтингида математика ва табиий фанларни билиш бўйича паст ўринларни эгаллади

Таълимдаги ютуқларни баҳолаш халқаро ассоциацияси (IEA) томонидан TIMSS 2023  баҳолаш дастури доирасида ўзбекистонлик ўқувчиларнинг математика ва табиий фанларни билиш натижаси эълон қилинди. Бу ҳақда Мактабгача ва мактаб таълими вазирлиги маълум қилди.

Қайд этилишича, 2023 йил апрель-май ойларида Ўзбекистонда ўтказилган ушбу тадқиқотда барча ҳудудлардан танлаб олинган 166 та мактабдан жами 8800 нафар ўқувчи (шундан, 4450 нафар 4-синф ва 4350 нафар 8-синф) иштирок этган.

Шунингдек, мазкур мактабларнинг 166 нафар директорлари ҳамда 1035 нафар математика ва табиий фанлар бўйича ўқитувчилари ҳам сўровномада қатнашган.
Халқаро ҳисобот натижаларига кўра, Ўзбекистондаги 8-синф ўқувчиларининг математик саводхонлик бўйича ўртача кўрсаткичи 421 балл бўлиб, қатнашувчи 44 та давлатдан 32-ўринни эгаллаган. 8-синф табиий фанлар (Science) саводхонлиги бўйича эса қатнашган 44 та давлат орасидан 396 балл билан 39-ўринни қайд этган.

Тадқиқотда қатнашган ўзбекистонлик 4-синф ўқувчилари табиий фанлар (Science) саводхонлиги бўйича 412 балл тўплаган ва иштирокчи 58 та давлат ичида 54-ўринни қўлга киритган. Математика саводхонлиги бўйича эса қатнашувчи 58 та давлат ичида 443 балл билан 50-ўринни эгаллаган.

Ўзбекистонда 4-синфлардаги қизлар (446 балл) математика йўналишида ўғил болалардан (440 балл) яхшироқ натижа қайд этган бўлса, табиий фанлар йўналишида ҳам худди шундай фарқ сақланиб қолган (қизлар 414 балл, ўғил болалар 409 балл).

Табиий фанлар йўналишида 8-синфлардаги қизлар (395 балл) ва ўғил болалар (396 балл) деярли бир хил натижа қайд этган бўлса, математика йўналишида ўғил болалар (426 балл) қизлардан (416 балл) кўра юқорироқ натижа эгаллаган.

Эслатиб ўтамиз, аввалроқ 2024 йилги EF English Proficiency индексига кўра, Ўзбекистон аҳолиси инглиз тилини билиш даражаси паст мамлакатлар қаторидан жой эгаллагани хабар қилинганди. Унга кўра, Ўзбекистон 114 та мамлакат орасида 98-ўринни эгаллаган.