Ukraina Bashar Asad rejimini qulatishga yordam bergan – WP

Ukraina Bashar Asad hokimiyatdan ag‘darilishidan biroz oldin Suriyadagi “Hayat Tahrir ash-Shom” guruhiga uchuvchisiz dronlarni yetkazib bergan. Bu haqda “The Washinton Post” xabar berdi.

Ma’lum qilinishicha, Kiyev suriyalik isyonchilarni qurollantirayotgani haqida ogohlantirgan. Nashrga ko‘ra, Suriyaga 150 ta dron va 20 ta operator yuborilgan, ammo ularning voqealar rivojiga ta’siri unchalik katta bo‘lmagan.

Manbaga ko‘ra, bu voqealar to‘rt-besh hafta oldin sodir bo‘lgan. Kiyev “Hayat Tahrir ash-Shom” guruhiga yordam berish uchun Idlibdagi isyonchilar shtab-kvartirasiga taxminan 150 ta FPV dronlari va 20 ta tajribali dron operatorlarini yuborgan.

“Ukrainaning harakatlari Asadning ag‘darilishida kamtarona rol o‘ynagan”, deyiladi xabarda.

Rossiya Prezidenti Vladimir Putinning Suriyadagi aholi punktlari bo‘yicha maxsus vakili Aleksandr Lavrentev ukrainaliklar dronlarni yetkazib berish, isyonchilarga ulardan foydalanish va o‘zini o‘zi yig‘ish ko‘nikmalarini o‘rgatayotgani haqida ma’lum qilgan.

“Ukraina Rossiyaga maksimal darajada zarar yetkazish uchun Suriya hududidan allaqachon foydalanishni boshladi”, degan maxsus vakili.

Eslatib o‘tamiz, 8 dekabrga o‘tar kechasi qurolli muxolifat Damashqqa kirib kelib, Asad rejimini qulatgan edi. Shundan so‘ng Bashar Asad mamlakat poytaxtini samolyotda tark etgandi. 8 dekabr kuni tushdan keyin Rossiya TIV Asad “Suriya Arab Respublikasi hududidagi qurolli mojaroning qator ishtirokchilari” bilan muzokaralardan so‘ng prezidentlik lavozimini tark etishga qaror qilganini va mamlakatni tark etganini tasdiqlagandi. Biroz vaqt o‘tib, Asad Rossiyada ekani, uning oilasiga siyosiy boshpana berish qarorini Rossiya Prezidenti Vladimir Putin qabul qilgani haqida xabar berilgandi.