Toshkentda 5 ta mashina ishtirokida YTH sodir bo‘ldi

Bugun, 2 fevral kuni Toshkent shahrida 5 ta avtomobil ishtirokida yo‘l transport hodisasi sodir bo‘ldi. Bu haqda shahar IIBB YHXB xabar berdi.

Ma’lum qilinishicha, voqea soat 18:30 larda Shayxontohur tumani Furqat ko‘chasida sodir bo‘lgan. 2 ta Matiz, 2 ta Spark va 1 ta Lacetti rusumli avtomashinalar to‘qnashgan. 

YTH oqibatida yo‘l chetida texnik nosoz bo‘lgan Matiz rusumli avtomashinani ta’mirlayotgan ikki nafar fuqaro yengil jarohat olgan, ularga tez tibbiy yordam xodimlari tomonidan birinchi yordam ko‘rsatilgan.

Bildirilishicha, holat yuzasidan Toshkent shahar IIBB YHXB mas’ul xodimlari tomonidan surishtiruv harakatlari olib borilmoqda.

Eslatib o‘tamiz, 26 yanvar kuni Toshkent shahrining Chilonzor tumanida Malibu va Spark ishtirokida yuz bergan yo‘l-transport hodisasi oqibatida bir nafar kishi vafot etgandi. 27 yanvar kuni Shayxontohur tumani Ko‘kcha Darvoza ko‘chasida Malibu va KIA avtomashinalari o‘rtasida YTH yuz berdi.