Shavkat Mirziyoyevga yana bir bor Ka’ba eshiklari ochildi (fotoreportaj)

Avvalroq “Markaziy Osiyo – Ko‘rfaz arab davlatlari hamkorlik kengashi” formatidagi birinchi sammitda ishtirok etish uchun Saudiya Arabistoniga borgan O‘zbekiston Respublikasi Prezidenti Shavkat Mirziyoyev kecha, 18 iyul kuni Umra ziyoratini amalga oshirgani haqida o‘z manbalarimizga tayanib xabar bergan edik. Prezident Administratsiyasi ushbu ma’lumotni tasdiqladi. 

“Davlat rahbari lavozimiga saylanganidan keyin ilk xorijiy tashrif bilan Saudiya Arabistonida bo‘lib turgan  O‘zbekiston Respublikasi Prezidenti Shavkat Mirziyoyev muqaddas Makka shahriga bordi”, deb xabar berdi Mirziyoyevning matbuot xizmati. 

Qayd etilishicha, 19 iyul - Islom olamida boshlangan hijriy 1445 yil muharram oyining birinchi kunida davlat rahbari ehromga kirib, Umra amallarini bajargan. Yana bir bor Ka’batullohning ichida namoz o‘qish sharafiga muyassar bo‘lgan. 

“Shavkat Mirziyoyev dinimiz arkonlariga muvofiq Baytulloh atrofida yetti bor tavof, Safo va Marva tepaliklari orasida yettita sa’y qildi. Vatanimiz ravnaqi, el-yurtimiz tinchligi va farovonligi, barcha yurtdoshlarimiz, yosh avlodimiz baxtu iqboli va yorqin kelajagini tilab duolar qilindi.

Ta’kidlash joizki, aynan shu kuni Ka’baning kisvasini almashtirish marosimi bo‘lib o‘tdi”, deyiladi Prezident matbuot xizmati bergan xabarda. 

Prezident Shavkat Mirziyoyevga Musulmonlar idorasi raisi Nuriddin Xoliqnazarov, Prezident Administratsiyasi rahbari Sardor Umurzoqov va kuyovlari – Oybek Tursunov hamda Otabek Umarov hamrohlik qilgan. 

Eslatib o‘tamiz, Mirziyoyev 2022 yilning avgust oyida Saudiya Arabistoniga tashrifi doirasida Makka shahrida bo‘lib, Umra amallarini ado etgan edi. 

“Markaziy Osiyo – Ko‘rfaz arab davlatlari hamkorlik kengashi” formatidagi birinchi sammitda ishtirok etish uchun Saudiya Arabistoniga borgan Tojikiston Prezidenti Imomali Rahmon ham Umra ziyoratini amalga oshirib, Ka’baga kirishga muvaffaq bo‘ldi. Qozog‘iston Prezidenti Qosim-Jomart To‘qayev esa Madinaga borib, Masjid an-Nabaviyni ziyorat qildi.