“Sardoba“dan suv chiqishi kamaydi – FVV

north_east

Prezident Sardoba tumani aholisi bilan uchrashdi (fotoreportaj)

north_east

Sirdaryoda toshqin: 11,5 mingdan ortiq fuqaro evakuatsiya qilindi

Avvalroq, joriy yilning 1 may kuni soat 05:55da Sirdaryo viloyatida joylashgan “Sardoba” suv ombori dambasining 6 piket devorida suv chiqishi yuzaga kelgani haqida xabar berilgandi. Natijada Sardoba tumani Qo‘rg‘ontepa aholi yashash punktiga suv kirgani ma’lum qilgan. Ushbu holat bo‘yicha O‘zbekiston Favqulodda vaziyatlar vazirligi navbatdagi bayonot bilan chiqdi.

Ta’kidlanishicha, mazkur vaziyat oqibatlarini bartaraf etish, evakuatsiya tadbirlarini tashkillashtirish bo‘yicha amalga oshirilgan ishlar bilan yaqindan tanishish maqsadida, voqea joyiga O‘zbekiston Respublikasi Prezidenti yetib borgan.

Qo‘shimcha ma’lumot sifatida shuni qayd etish joizki, Do‘stlik, Paxtakor, Zarbdor va Mirzacho‘l tumanlarida tashkil etilgan maxsus shtablar tomonidan maktab, kollej, xususiy korxonalar va aholi xonadonlariga fuqarolarni joylashtirish choralari ko‘rilmoqda.

Shuningdek, Mirzaobod tumanidagi “Navbahor”, “Haqiqat” va “Bahoriston” MFYlari aholi yashash punktlariga qisman suv kirgan. Aholi ushbu tumandagi kasb-hunar kolleji, Safarbarlik chaqiruv rezervi bo‘yicha harbiy qism va shifoxonaga evakuatsiya qilingan. Evakuatsiya tadbirlari Jizzax shahriga ham tashkillashtirilgan.

Xususan, Oqoltin tumanidagi “Ahillik”, “Shodlik”, “Saxovat”, “Navoiy”, “Do‘stlik”, “Ko‘rkamdiyor”, “Toshkent”, “Yangihayot”, “Obod” va “Mustahkam” MFYlarining aholisi Jizzax viloyati Gagarin shaharchasiga vaqtinchalik ko‘chirildi. Unda aholi uchun 6000 dona niqob, 80 dona antiseptik vosita, 200 juft bir martalik qo‘lqoplar va boshqa tibbiyot vositalari tarqatildi.

Bundan tashqari, Sardoba shaharchasidagi aholini ham Jizzax viloyati Gagarin aholi yashash punktiga evakuatsiya qilish ishlari olib borilmoqda.

Shu bilan birga, Mirzaobod tumanidagi “Beruniy”, “Paxtaobod”, “Baliqchi”, “Haqiqat”, “Bahoriston”, “Yangiovul” va “Do‘ngariq” MFYlari aholisi suv toshish xavfi bo‘lgani uchun Yangiyer shahriga evakuatsiya qilinmoqda.

Ma’lum qilinishicha, toshqin oqibatlarini bartaraf etish uchun suv oqimlari Oqoltin tumani hududidan o‘tuvchi Abay kanaliga tushirilib, Jizzax viloyatidagi Arnasoy ko‘liga yo‘naltirilgan. Hozirda dambadan suv chiqishi kamaygan. Favqulodda vaziyat oqibatlarini bartaraf etish ishlari davom ettirilmoqda.